اروپا کي سخت طوفان ته چمتو والي نيول کيږي
۱۳۹۸ بهمن ۲۰, یکشنبه
د طوفانونو له کبله د اروپا په يو شمېر هوايي ډګرونو کي الوتنې ځنډول سوي دي. د بېلګي په توګه د بروکسل او د بريتانيې په هيترو هوايي ډګرونو کي د الوتکو ناستي او الوتنې بندي کړل سوي دي. د بريتانيې بريټش ايرلاينز مشتريانو ته د رانيول سوو ټيکټانو د بدلولو او په نورو ورځو د الوتلو وړانديز کړی دی. د آلمان هوايي شرکتونه هم داسي وړانديز کړی.
د بريتانيې د اورګاډي او په همدې شان د آلمان د اورګاډي شرکتونه و خپلو مشتريانو ته سپارښتنه کړې ده چي که امکان ولري نو دي خپل سفرونه وځنډوي. د آلمان په شمال او لوېديځ کي بعضو سيمو ته د اورګاډي سفر احتياطا درول سوی دی. په شمالي بحيره کي د کالې او دوور تر منځ د اوبو له لاري په تګ راتګ کي ځنډ او خنډونه رامنځ ته سوي دي.
د هواپېژندنې آلمانۍ ادارې (DWD) د «زابينه» طوفان د رارسېدو له کبله د هيواد په يو شمير برخو کي خبرداری ورکړی دی. اټکل کيږي چي په آلمان کي به دغه طوفان د يکشنبې او دوشنبې تر منځ په شپه کي تر ټولو زيات قوي وي.
د طوفانونو د رارسېدو د خبرداريو له کبله په آلمان او په نورو اروپايي هيوادونو کي يو شمېر غونډي او پروګرامونه لغوه کړل سوي دي. د بېلګي په توګه د لندن لس کلومتره د ځغستا سيالي چي ورته د ۲۵ زرو ګډونوالو د راتلو اټکل سوی ؤ، لغوه کړل سوې ده. په آلمان، هالند، بلجيم او بريتانيا کي يو شمېر د فوټبال سيالۍ هم نورو ورځو ته ځنډول سوي دي.
د آلمان د هواپېژندنې د ادارې د تعريف له مخي «زابينا» داسي يو طوفان دی چي په کال کي دوه واري رامنځ ته کيږي. خو د اټکل له مخي سږنی طوفان به د ۲۰۰۷ او ۱۹۹۹ کالونو د طوفانونو په شان قوي نه وي.
AG/AWA/NS