جرمني: پر کور د الوتکې لویدو درې تنه وژلي
۱۳۹۹ مرداد ۵, یکشنبه
د شنبې په ورځ (د ۲۰۲۰م کال د جولای میاشتې پر ۲۵مه نیټه) د آلمان د نورد راین ویستفالن ایالت په ویزل ښار کې یوه کوچنۍ الوتکه په آسمان کې له یوه ستر بالون سره تر ټکر وروسته، د استوګنې پر یوه کور را لویدلې. د معلوماتو له مخې په دې پیښه کې درې تنه وژل شوي او یو ماشوم ټپي شوی دی.
د نورد راین ویستفالن ایالت پولیسو ویلي چې دغه سپکه الوتکه د ویزل په ښار کې د پنځو کورونو لرونکې له یوې ودانۍ سره جنګیدلې ده. د پولیسو په وینا، تر لویدو وروسته الوتکې او دغه کور اور اخیستی وو چې بیا اور ووژل شو. د دې ایالت پولیسو زیاته کړې چې له ودانۍ څخه یو کوچنی ټپي ماشوم هم ژغورل شوی دی.
دا په داسې حال کې ده چې د پیښې عیني شاهدانو ځايي رسنیو ته د الوتکې تر را لویدو وړاندې په هوا کې د الوتکې او یوه ستر بالون د ټکر خبره کړې ده. دغه الوتکه د دوو کسانو د انتقال ظرفیت لري خو پولیس وايي چې تر اوسه پورې دا روښانه نه ده چې په الوتکه کې څو کسان سپاره وو. د پولیسو په وینا، د وژل شویو دریو کسانو د هویت په هکله هم پلټنې روانې دي.
د ژغورنې عملې د پیښې سیمې ته نیږدې یو پراشوټ هم موندلی او پولیس بیا په دې باور دی چې دغه پراشوټ به د الوتکې وي.