په آلمان کې د مهاجرو د کورنيو د الحاق له پاره هڅي
۱۴۰۰ تیر ۱, سهشنبه
د آلمان په قانون کې د کورنۍ د یوځای کیدو بشپړ حق په پام کې نیول شوی دی. هغه کسان چې په المان کې پناه ترلاسه کوي، د کورنۍ غړي يې هم کولی شي زر تر زره آلمان ته راشي او د خپلې کورنۍ له غړو سره ګډ ژوند ته ادامه وکړي. په ځانګړي توګه دا ډول کسان کولی شي قانوني عمر ته خپل نه رسیدلي ماشومان یا د ژوند ملګری یا ملګرۍ آلمان ته را وغواړي.
همدارنګه ماشومان هم د خپل مور او پلار د رابللو حق لري. د اجتماعي حفاظت ترلاسه کوونکو مهاجرو په برخه کې بیا قانون یو څه توپير کوي. پناه غوښتونکو ته د دا ډول حفاظت ورکولو لړۍ په ۲۰۱۶م کال کې هغه وخت پيل شوه چې په کورنۍ جګړه کې له ښکیل هیواد سوریې څخه آلمان ته د پناه غوښتونکو د راتګ لړۍ پيل شوه.
د روان کال له مارچ میاشتې راهیسې له آلمان څخه دباندې د دغه هیواد په قونسلګریو کې د کورنۍ د الحاق یا یوځای کیدو په زرګونه غوښتنلیکونه جمع او اجراتو ته پراته دي.
د دغه هیواد په پارلمان کې کیڼ اړخي ګوند د کورنیو د الحاق پر سست بهیر او د دوی غوښتنلیکونو ته په رسیدګۍ کې د ځنډ له امله شدید انتقاد کړی دی. د آلمان مرکزي حکومت په نورو هیوادونو کې خپلو نمایندګیو او د ویزې په دفترونو کې په موقتي ډول د کارمندانو د زیاتولو ژمنه کړې ده او ویلي یي دي چې له دې سره به د کورنۍ د الحاق ویزو له پاره د غوښتنلیکونو د ارزونې بهیر ګړندی شي.
د فونکه رسینزې ډلې، د رپوټ پر بنسټ د روان کال د مارچ میاشتې له وروستیو څخه د آلمان په قونسلګریو کې نږدې ۱۱۰۰۰ د ویزې دا ډول غوښتنلیکونه وړاندي شوي دي.
له دې ډلې اکثره غوښتنلیکونه یي په لبنان، شمالي عراق او ترکیې کې د آلمان په قونسلګریو کې د ارزول کیدو په تمه دي.
په دې ترتیب سره د آلمان قونسلګریو هره میاشت د زرو ویزو د ورکړې له ټاکل شوې اندازې یا حد څخه کمې ویزې ورکړي دي.
د روان کال په جنوري مياشت کې د آلمان نمایندګیو په مجموع کې د کورنۍ د الحاق ۲۶۴، په فبرورۍ کې ۴۷۳، مارچ کې ۴۴۲ او په اپریل میاشت کې ۳۶۳ ویزې صادر کړي دي.
آژانسونه: ش.ن/ ن.ز