سپينه ماڼۍ: د جګړې وزارت نوم د ځواک څرګندونه کوي
۱۴۰۴ شهریور ۱۵, شنبه
د امریکا متحده ایالاتو د ولسمشر دونالد ترمپ له لوري دغه لاسلیک شوی فرمان د امریکا دفاع وزير پيت هېګسېت، او د امریکا دفاع وزارت یا پنتاګون ته اجازه ورکوي چې په رسمي لیکونو او عامه اړيکو کې د «جګړې وزير» او د «جګړې مرستيال وزير» سرليکونه او القاب وکاروي.
په عین حال کې د امریکا ولسمشر په خپله د یوه وزارت د نوم بدلولو صلاحیت نه لري او له همدې کبله اوس د دې کار لپاره د کانګرس پرېکړه اړينه ده ترڅو دغه ګام عملي بڼه غوره کړي.
د سپينې ماڼۍ د يو سند له مخې، ټرمپ هېګسېت ته لارښوونه کړې څو داسې قانوني او اجرايي وړانديزونه برابر کړي چې د امریکا متحده ایالاتو د دفاع وزارت نوم دايمي بدلون تضمين کړي. په همدې ترڅ کې پنتاګون یا د امریکا دفاع وزارت پر خپله اکس پاڼه کې د یوه پیغام خپرولو له لارې لیکلي: «موږ د جګړې وزارت یو.»
د امریکا ولسمشر ټرمپ تل ټينګار کړی چې د امریکا د دفاع وزارت نوم بايد بدل شي، ځکه چې د هغه په وينا دا به نړۍ ته د امریکا متحده ایالاتو د ځواک، چمتووالي او هوډ لا پياوړی پيغام ورسوي.
دا په داسې حال کې چې د امريکا دفاع وزارت تر ۱۹۴۷م کال پورې د «جګړې وزارت» په نوم پېژندل کېده. هغه مهال، وروسته له دويمې نړيوالې جګړې، د امریکا کانګرس د دغه هیواد پوځ، بحري او هوايي ځواک سره يو ځای کړل او د وزارت نوم يې «دفاع وزارت» ته بدل کړ چې له هغه وخت راهیسې ورته دغه دفاع وزارت او یا پنتاګون بلل کیده.