روسي چارواکي: د دوو پلونو په نړېدو کې ۷ کسان وژل شوي
۱۴۰۴ خرداد ۱۱, یکشنبه
د روسیې د بېړنیو پېښو پر وړاندې د مبارزې وزارت او ځايي چارواکو ویلي ۷ کسان د شنبې په ورځ ناوخته په بریانسک سیمه کې هغه مهال ووژل شول چې د لویې لارې په اوږدو کې یو پل ونړېد او لاندې د اورګاډي پر پټلې وروغورځېد. چارواکو ويلي چې ۶۹ کسان ژوبل شوي هم دي.
د روسيې د اورګاډو ادارې په سر کې پر ټيلګرام شبکه ولیکل چې په بریانسک سیمه کې د دغه پله نړېدل «په ترانسپورټي ماموریت کې د غیرقانوني مداخلې» پایله ده، خو وروسته ېې دغه پُست لرې کړ.
نور ولولئ: کیف وایي لا هم د روسيې د اوربند د شرطونو په تمه دی
د بریانسک والي الکساندر بوګوماز پر ټيلګرام لیکلي چې د پېښې ۴۷ ټپیان روغتون کې بستر شوي چې د درو ماشومانو په ګډون د یو شمېر ټپیانو روغتیايي وضعیت نازک دی.
بل پل په کورسک سیمه کې د یکشنبې په ورځ سهار وختي نړېدلی دی. د روسيې د اورګاډو ادارې او د کورسک سیمې سرپرست والي الکساندر خینشتاین پر ټيلګرام لیکلي چې دغه پل داسې مهال نړيدلی چې یو اورګاډی ېې له پاسه د تېرېدو په حال کې و. والي ويلي چې د «اورګاډي یوه برخه تر پله لاندې يوه سړک باندې راغورځېدلې ده.» هغه وویل چې لوکوموتیف یا د اورګاډي ماشين اور واخیست خو ژر ګل کړل شو.
نور ولولئ: آلمان اوکراين ته د وسلو په استولو کې د هدف ويشتلو واټن محدوديت له منځه وړي
د روسیې د بېړنیو پېښو پر وړاندې د مبارزې وزارت ويلي چې په بریانسک سیمه کې ټوله شپه د نجات عملیات روان ول چې په کې شاوخوا ۱۸۰ ژغورونکو ګډون درلود. د روسیې دولتي خبري آژانس د روغتیاپالانو له قوله ویلي چې د وژل شوو کسانو په ډله کې د اورګاډي چلوونکی هم شامل دی.
پر ټولنیزو رسنیو خپرو شوو انځورونو او ويډیوګانو کې ليدل کيږي چې مساپر د شپې په تیاره کې له یو بل سره مرسته کوي په داسې حال کې چې ژغورونکي هڅه کوي ځانونه ورورسوي.
نور ولولئ: ترمپ پر اوکراين باندې تر بریدونو وروسته پوتین «ليونی» بللی
د اندري کلیشاس په نوم یوه روسي سياستوال د دغو پېښو پړه پر اوکراین اچولې ده، خو رويټرز خبري آژانس چې دغه رپوټ ېې ورکړی، وايي چې د دغه خبر اړوند ځينې ادعاوې په خپلواکه توګه تائيدولی نشي.
د ۲۰۲۲م کال په فبرورۍ کې پر اوکراین د روسیې د پوځي یرغل راهیسې یادې سرحدي سیمې ډیری وخت د ناکراریو شاهدې پاتې شوي دي.
له آرشیف څخه: