اسرائيل په سوریه کې پر پوځي تاسیساتو حملې کړي، سورېې غندلي
۱۴۰۴ فروردین ۱۴, پنجشنبه
د اسرائيل پوځ د پنجشنبې په ورځ (۲۰۲۵م کال د اپریل ۳) وویل چې د سوريې په یو شمېر ښارونو کې ېې پوځي تاسیسات او اډې په نخښه کړي دي چې پکې ېې وسله وال یاغیان وژلي دي. د سوريې د بهرنیو چارو وزارت په یوه اعلامیه کې ویلي چې په دغو حملو کې د حما ښار پوځي هوايي اډه تقریباً ټوله تخریب شوې او په لسونو ملکیان او پوځي پرسونل پکې ټپیان شوي دي.
خو د اسرائيل پوځ د پنجشنبې په ورځ د اپریل ۳مه وویل چې د تېرې شپې په هوايي حملو کې ېې د سوریې په جنوبي سیمه تسیل کې وسله وال یاغیان وژلي دي. سرچينه وايي چې پر اسرائيلي عسکرو د عملیاتو پر مهال ډزې وشوې او دوی ېې په ځواب کې ځمکنۍ او هوايي حملې کړي.
د اسرائيل دفاع وزیر کتس د سوريې رهبر احمد الشرع ته ګواښ کړی دی چې هغه به له شدیدو عواقبو سره مخ شي که چېرته د اسرائیل امنیت له پاره ګواښ وي.
ورته نور ولولئ: بېربوک په سوریه کې د آلمان سفارت بيرته پرانيست
کتس ويلي: «زه د سوریې رهبر جولاني ته خبرداری ورکوم: که تاسو متخاصمو ځواکونو ته سوریې ته د داخلېدو اجازه ورکوئ او د اسرائيل امنيتي منافعې ګواښۍ، نو تاسو به ېې ډېره لوړه بیه پرې کړئ.» د اسرائيل دفاع وزیر د سوریې رهبر ته دغه خبرداری په یوه اعلامیه کې کړی دی.
اسرائيل ويلي دي چې دوی نه غواړي په سوریه کې پاتې وسلې د سوريې اوسنیو حاکمانو لاس ته ولويږي کوم چې اسرائيل ورته د جهادیانو په سترګه ګوري.
اسرائيل ويلي دي چې د چهارشنبې ورځې په حملو کې ېې په حمص ښار کې د ټي۴ پوځي اډه هم وېشتلې ده.
تېره میاشت هم اسرائيل وویل چې د سوریې پر دغې پوځي اډې يې دوه ځله حملې وکړې چې په وینا ېې پکې ېې د یاغیانو قابلیتونه په نخښه کړل.
د سوريې د بهرنیو چارو وزارت بیا د پنجشنبې په ورځ د اسرائيل حملې وغندلې او دا یې د سوريې پر حاکمیت یو «ښکاره تیری» وباله.
د بهرنیو چارو وزارت په دغه اعلامیه کې چې پر تلیګرام ېې خپره کړې ويلي چې «اسرائيلي ځواکونو د نړېوالو قوانینو او د سوریې د حاکميت په نقضولو، د هېواد په پنځو ساحو کې هوايي حملې کړي دي.»
ورته نور ولولئ: د بسپنه ورکوونکو په کنفرانس کې د سوریې له پاره د ۵،۸ میليارډه یورو مرسته
په اعلامیه کې زیاته شوې ده چې په مرکزي ایالت حما کې یوه پوځي هوايي اډه «نژدې په بشپړه توګه» له منځه تللې ده.
د سوریې د بشري حقونو د څار سازمان ویلي دي چې د حما پر پوځي هوايي اډې حمله کې «څلور کسان وژل شوي او د سوریې پوځي پرسونل په ګدون یو شمېر نور ټپيان شوي دي.»
په یو بل رپوټ کې بیا د یاد سازمان او د سوریې د محلي حکومت له قوله ويل شوي چې په دغو حملو کې ۹ کسان وژل شوي دي. دغه سازمان زیاته کړې چې وژل شوي کسان محلي سوریايي وسله وال دي.
د سوريې دولتي رسنۍ د رپوټ له مخې د اسرائيل په دغو حملو کې د نورو ځایونو تر څنګ په دمشق کې د دفاع یو څېړنیز مرکز ته نژدې علاقه هم هدف ګرځېدلې ده.
د سوریې د بهرنیو چارو وزارت وايي اسرائیل دغه حملې په داسې وخت کې کړي دي چې سوریه د ۱۴ کلنې جګړې د بیارغونې په حال کې ده چې کوم چې سوریې ېې «د هېواد دننه د تاوتریخوالو د عادي کولو» له پاره یوه ستراتیژي بولي.
ورته نور ولولئ: سوریه: ولسمشر د پنځو کلونو له پاره موقت اساسي قانون لاسليک کړ
له کله چې په سوریه کې د بشارالاسد رژیم نسکور او نوې اداره رامنځ ته شوې، د اسرائيل او سوريې ترمنځ سرحدي علاقو کې تاوتریخوالي ډېر شوي دي.
اسرائيل وايي دوی په سوریه کې د یاغیانو حضور نشي زغملی له همدې کبله ېې د سوريې سرحدي علاقو ته خپل ځواکونه استولي دي. اسرائيل د بشارالاسد حکومت پر مهال هم د کلونو له پاره د سوريې په خاروه کې د لبنان حزب الله ډلې پر ضد حملې کړي دي. خو د سوریې اوسنۍ رهبري وايي چې دوی د اسرائيل پر ضد د یوې جنګي جبهې د رامنځ ته کولو هوډ نه لري.
له آرشیف څخه: