یوناما: ۲۲،۹ ميليونه کسان په افغانستان کي مرستو ته اړتيا لري
۱۴۰۴ فروردین ۱۸, دوشنبه
د ملګرو ملتونو سازمان د دوشنبې په ورځ (د اپریل میاشتې ۷ نیټه) د «افغانستان د همغږۍ ډلې»(ACG)، غونډې په درشل کې، پر نړیوالو بنسپنه ورکوونکو غږ وکړ چې د افغانستان د خلکو «حیاتي» ملاتړ ته دوام ورکړي.
نوموړي سازمان د یوې اعلامیې په خپرولو سره له تمویلونکو څخه وغوښتل چې په ۲۰۲۵م کال کې دې هم د افغانستان ملاتړ ته دوام ورکړي. د دغه بنسټ د معلوماتو له مخې په افغانستان کې ۲۲،۹ میلیونه انسانان مرستو ته اړتیا لري.
د «افغانستان د همغږۍ ډلې» غونډه ټاکل شوې ده چې په روانه اونۍ کې په افغانستان کې د ملګرو ملتونو د استازولۍ (یوناما)، د تمویلونکو هیوادونو او نړیوالو بنسټونو د استازو په موجودیت کې په استانبول کې ترسره شي.
د ملګرو ملتونو سازمان د بشري چارو د همغږۍ او افغانستان له پاره د دغه سازمان د عمومي مشر د ځانګړي استازي مرستیال اندریکا راتواته، ویلي دي: »که غواړو له فقر څخه د افغانستان د خلکو په وتلو کې مرسته وکړو، باید د امکاناتو په لرلو سره او د هغوي ضرورتونو ته د رسیدګۍ له پاره اړینو میتودونو ته دوام ورکړو او په عین وخت کې ورته د اوږمهاله ثبات زمينه مساعده کړو.»
د ملګرو ملتونو سازمان دغه چارواکي زیاته کړه: «د افغانستان له خلکو سره د پیچلو ننګونو سربیره، باید کوښښ وکړو چې بیړنۍ مرستې په اوږدمهاله او پایداره حل لارې بدلي کړو. دغه کار به د زیان اوښتنې د اصلي عواملو له کمولو سره مرسته وکړي او دا د افغانستان، سیمې او نړۍ له پاره ډېر ارزښت لري.»
د ملګرو ملتونو سازمان په دې اعلامیه کې راغلي دي چې بشردوستانه همکارانو په ۲۰۲۴م کال کې د افغانستان د خلکو د بشري مرستو او لومړنیو ضرورتونو د تامین له پاره ۲۱،۳ میلیارده ډالره مرسته کړې وه چې دغه رقم تر هغې مخکې کال په پرتله د مرستو د کچې لوړوالی ښيې.
د ملګرو ملتونو استازولۍ زیاته کړې ده چې د مالي منابعو، بشري پروګرامونو او لومړنیو اړتیاوو په پوره کولو کې د نړیوال بحران جدي پایلې، کیدای شي په افغانستان کې د ثبات په برخه کې د تیرو څلورو کلونو مات او ګُډ لاسته راوړنې له ګواښ سره مخامخ کړي.
په دغو لاسته راوړنو کې د غذایي امنیت وضعیت ښه والی او د افغانستان د اقتصاد نسبي وده شامله ده.
د ملګرو ملتونو سازمان خبرداری ورکړی دی، په هغه صورت کې چې که د دغه هیواد د ثبات د ملاتړ له پاره لازمه پانګونه ونه شي، ممکن افغانان د خپلو ستونزو د حل له پاره منفي او غیر قانوني حل لارو ته مخه کړي.
یوه له دغو منفي حل لارو څخه غیر قانوني مهاجرتونه دي چې د وروستي انتخاب په توګه په پام کې نیول کیږي. دغه مهاجرتونه خلک له جدي خطرونو سره مخامخ کوي او پر سیمې اضافي فشار واردوي.