د ترکیې د استخباراتو رئیس تهران ته تللی دی
۱۴۰۳ بهمن ۲۱, یکشنبه
د ترکیې دولتي خبري آژانس «اناتولي» رپوټ ورکړی دی چې ابراهیم کالین د شنبې (د فیبرورۍ میاشتې ۸ نیټه) ورځې په وروستیو کې د ایران د اطلاعاتو وزیر اسماعیل خطیب او د ملي امنیت عالي شورا له مشر علي اکبر احمدیان سره لیدلي دي.
په دې اعلامیه کې راغلي دي چې هغوي: «د ترهګریزو سازمانونو، په ځانګړي توګه (PKK) او داعش پر وړاندې پر مبارزې، ګډ ګواښونو، سوریې وضعیت، د غزې اوربند او د فلسطین په مسئله کې پر تحولاتو خبرې کړي دي.»
ترکیه د (PKK) کُردي ملیشه ډله منع اعلان کړې ده او یو ترهګر سازمان یې بولي. دغو دوو هیوادونو د سوریې د اوږدمهاله کورنۍ جګړې په دوو اړخونو کې قرار درلود.
ترکیې د بشارالاسد د رژیم د مخالفینو ملاتړ کولو، په داسې حال کې چې د ایران حکومت بیا د اسد د رژیم پلوي و.
اسد د ۲۰۲۴م کال د فیبرورۍ په ۸ نیټه وتښتیده او مخالفین یې واک ته ورسیدل. د ایران او ترکیې مشرانو خپله لومړنۍ غونډه د هم هغې میاشتې په پای کې په قاهره کې ترسره کړې وه.
اناتولي د دیپلوماتیکو سرچینو په حواله ویلي دي چې د ترکیې د بهرنیو چارو وزیر هاکان فیدان هم له خپل ایراني سیال عباس عراقچي سره د دوه اړخیزو مسایلو او فلسطین د وضعیت په اړه تلیفوني خبرې کړي دي.