د ترکیې په يوه هوټل کې اور؛ ۶۶ کسان مړه شوي دي
۱۴۰۳ بهمن ۲, سهشنبه
د ترکیې په شمال لویدیځ کې د سکي لوبې د لوبغاړو له پاره په یوه ځانګړي شوي هوټل کې د اور لګیدو په پیښه کې د ترکي چارواکو په خبره ۶۶ کسان مړه شوي دي او ګڼ نور ټپیان دي. د معلوماتو له مخې، د اور پرمهال د هوټل یو شمیر مېلمنو له کړکیو ځانونه لاندې اچولي چې له کبله یې ژوند بایللی دی. زیاته شوي چې د ښوونځیو د رخصتیو پرمهال په هوټل کې د مېلمنو ظرفیت نهايي اندازې ته رسیدلی وو.
د ترکیې د کورنیو چارو وزارت د چارواکو په خبره، په دغه پیښه کې ۵۵ کسان ټپان شوي هم دي. د اور دغه پیښه د ترکیې په شمال لویدیځ کې د کارتل کایا په سیمه کې د غره پر سر باندې په یوه جوړ شوي هوټل کې د سه شنبې په ورځ په ځايي وخت د شپې په ۳:۲۷ دقیقو رامنځ ته شوې ده.
له کړکیو د مېلمنو د ژغورنې هڅې
د ترکي رسنیو د راپورونو له مخې، د هوټل ځینو مېلمنو د اور له ویرې او د ژوند ژغورولو په هدف د هوټل له کړکیو ځانونه غورځولي چې له کبله یې یو شمیر کسانو ژوند بایللی دی. ځینو رسنیو راپور ورکړی دی چې د هوټل ځینو مېلمنو د کمپلو او پردو په واسطه له کړکیو ځانونه ځوړند کړي ول.
د ترکیې په تلویزونونو کې په خپرو شویو فلمونو کې لیدل کیږي چې د هوتل پورتنی منزل د اور په لمبو کې سوځي او له هوټل څخه دود د اسمان پر لوري پورته کیږي.
د ترکیې د چارواکو په خبره، د ښوونځیو د رخصتیو پرمهال دغه هوټل خپل ظرفیت ته رسېدلی وو او د پیښې پرمهال په دغه هوټل کې تر ۲۳۰ زيات مېلمانه میشت ول.
ترکي چارواکو د پلټنو د پیل خبر ورکړی
ترکي چارواکو ویلي دي چې د اور وژنې له پاره ۳۰ موټر او ۲۸ امبولانسونه د سیمې ځای ته رسیدلي، خو زیاتوي چې د غره په هسکه سیمه کې د هوټل موقعیت د دوی له پاره د ژغورنې هڅې سختې کړي دي. د چارواکو په خبره، په سیمه کې له نورو هوټلونو مېلمانه نورو خوندي ځایونو ته انتقال شوي دي.
د ترکیې په شمال لویدځ کې د کارتال کایا سیمه د کورغلو غرونو په لړۍ کې د سکي لوبې له پاره یو په زړه پورې سیمه شمیرل کیږي. دغه سیمه د استانبول ختیځ لوري ته په ۳۰۰ کیلومترۍ کې او پلازمینې انقرې په شمال لویدځ ۱۷۰ کیلومترۍ کې موقعیت لري.
د ترکیې د عدلیې وزیر یلمیز تونچ، شپږو څارنوالانو ته د یادې پیښې د پلټنې دنده سپارلې ده. تر اوسه پورې د اور د دلیل په هکله څه نه دي ویل شوي. ټاکل شوې چې د ترکیې د روغتیا، کلتور او فرهنګ او کورنیو چارو وزارت چارواکي به هم د ورځې په اوږدو کې د پیښې له سیمې لیدنه وکړي.