ترمپ پر سوریې لګول شوي بندیزونه لغوه کړل
۱۴۰۴ تیر ۱۰, سهشنبه
د امريکا متحده ايالاتو ولسمشر دونالد ترمپ، د دوشنبې په ماښام پر سوریې باندې د امريکا د بندیزونو د لغوه کولو په موخه يو اجرايوي فرمان لاسليک کړ. په دې ترتیب به د منځني ختيځ دا هيواد نور له نړيوال مالياتي نظام څخه منزوي نه وي.
امريکا پر سوریې د بندیزونو پروګرام په ۲۰۰۴م کال کې نافذ کړی وو چې تر اوسه یې دوام درلود او په ترڅ کې یې پر سوریې پراخې پایلې لرونکي بندیزونه لګول شوي ول چې د سوریې د مرکزي بانک په ګډون یې يو شمیر ادارې اغیزمنې کړې وې.
د سپينې ماڼۍ د مطبوعاتې څانګې مشرې کیرولين ليويټ، خبريالانو ته وويل چې «دا د سولې او ثبات پر لور د دغه هېواد د پرمختګ څخه د ملاتړ يوه هڅه ده.»
پر اسد لګول شوي بندیزونه به پر ځای وي
ليويټ، زياته کړه چې د امريکا د دې ګام پر اساس به د سوریې پر پخواني ولسمشر بشارالاسد، او پر ملګرو یې لګيدلي بندیزونه پر ځای پاتې وي. همدا شان د بشري حقونو تر پښو لاندې کوونکو، د مخدره موادونو قاچاق کوونکو، د کيمياوي وسلو په فعاليتونو کې ښکیلو کسانو، له اسلامي دولت يا داعش سره تړاو لرونکو او د ایران پر نیابتي ډلو باندې د بندیزونو د پر ځای ساتلو پريکړه شوې ده.
د ترمپ، په فرمان کې د امريکا د بهرنيو چارو وزارت ته دا لارښوونه هم شوې ده چې د «حيات تحرير شام» [اچ ټي اس] اسلامپالې ډلې د بهرنۍ ترهګرۍ ډلې په توګه د نومولو پر خپله پريکړه دې له سره غور وکړي.
اړونده موضوع: آیا داعش د سوریې سیاسي راتلونکي ته گواښ دی؟
امريکا سوريه د يوه داسې هېواد په توګه چې د ترهګرۍ سرپرستي کوي، درجه بندي کړې وه او همدا راز یې اچ ټي اس او له دغي ډلې سره تړاو لرونکی د دغه هېواد د موقتي دورې ولسمشر احمد الشرع، هم د ترهګر په توګه نومولی وو. خو اوس به د بهرنيو چارو وزیر مارکو روبيو، د دې بندیزونو د لغوه کولو په موخه پر هغه باندې غور وکړي.
د ترمپ د اقدام هرکلی
د سوریې د بهرنيو چارو وزیر اسد الشيباني، د ټولنیزو رسنیو پر ايکس پلیټفارم باندې په خپل يوه پيغام کې د امريکا دا ګام «د بدلون يوه ستره نقطه» بللې ده.
نوموړي ليکلي دي: «د اقتصاد د بيارغونې په لاره کې پروت د دې ستر خنډ له لیرې کولو سره سم د بيارغونې او پرمختګ له پاره د اوږده انتظار دروازې د پرانیستل کيدو په حال کې دي.»
اړونده موضوع: د سوریې د مؤقت حکومت مشر په هیواد کي د "سولې او ثبات" غوښتونکی سو
نوموړي همدا راز ويلي: «د بې کوره شويو سوريايانو له پاره په باوقاره توګه خپل هېواد ته د راستنېدو» شرائط مناسب دي.
د تیر میلادي کال په می میاشت کې د سعودي عربستان او ترکیې د غوښتنو په غبرګون کې ترمپ، لا دمخه پر سوریې لګول شوي ډېر بندیزونه لغوه کړي ول.
د تیر کال په دسمبر میاشت کې د موقت دورې د ولسشر احمد الشرع، په مشرتوب اسلامپالو ياغيانو د چټکو عملیاتو په ترڅ کې بشارالاسد له واکه ګوښه کړ. له هغه وخت راهېسې سوريې د نړيوالو اړيکو د بیرته رغولو له پاره مهم ګامونه پورته کړل.