ترمپ: پوتین سره د خپلې ټیلفوني اړېکې له پاره «ډېر خپه» یم
۱۴۰۴ تیر ۱۴, شنبه
اوکراین د روسیې د جمعې شپې توغندیز او ډرون بریدونه په اوکراین کې په درې کلنې جګړه کې تر ټولو ستر بریدونه ښودلي دي. مسکو پر اوکراین دغه بریدونه د ترمپ او پوتین د ټيلفوني اړيکې یوازې څو ساعتونه وروسته وکړل.
نور ولولۍ: امریکا اوکراین ته د خپلو ځینو پوځي مرستو لېږد درولی
تر دغو بریدونو وروسته د امریکا متحده ایالاتو ولسمشر دونالد ترمپ یو ځل بیا پر مسکو غوصه شوی دی. هغه د جمعې په ورځ وويل چې د روسیې له ولسمشر ولادیمیر پوتین سره د خپلې ټیلفونې اړیکې له پاره «ډېر خپه» دی. ترمپ د پوتین په هکله وویل: «هغه غواړې ټوله لار ووهي او صرف انسانان ووژني چې دا ښه کار نه دی.»
ترمپ وویل چې پوتین سره ېې په ټيلفوني اړیکه کې د تحریمونو په هکله «ډېرې» خبرې وکړې او «هغه پوهیږي چې [تحریمونه] کېدای شي ولګيږي.»
نور ولولۍ د اوکراین پر خاوره د روسیې د هوایي بریدونو نوې څپه:
د ترمپ او پوتین د جمعې په شپه ټیلفوني خبرې پرته له کومې مثبتې پاېلې او لاسته راوړنې وې. د امریکا ولسمشر د جمعې په شپه د اوکراین له ولسمشر ولودیمیر زیلنسکي سره هم پر ټيلفون وغږېد. ترمپ چې په اوکراین کې د اوربند او جګړې د پای له پاره هڅه کوي تر دې مخکې ېې هم څو ځله له پوتین سره پر ټيلفون خبرې کړي دي.
اوکراین وايي د ترمپ او پوتین تر ټيلفوني اړېکې څو ساعته وروسته مسکو پر اوکراین تر ټولو لوی بریدونه وکړل چې په تېرو درو کلونو کې ېې ساری نه و. د کیف یوه اوسېدونکي تیمور د فرانسې خبري آژانس ته وویل: «دا ډول بریدونه تر دې مخکې هېڅ کله نه وو شوي. تر دې مخکې هېڅ کله هم دومره چاودنې نه وې شوې.»
کریملین د جمعې په ورځ وویل چې «ترجیحاً» غواړي په اوکراین کې د خپل یرغل اهدافو ته پر سیاسي او ديپلوماتيکو لارو ورسیږي.
نور ولولۍ: ترمپ پر اوکراين باندې تر بریدونو وروسته پوتین «ليونی» بللی
روسیه پر اوکراین خپل پوځي یرغل ته د «ځانګړي عملیات» نوم ورکوي. د کریملین ویاند دیمیتری پیسکوف د روسیې یرغل ته په اشارې وویل: «خو تر هغې چې ېې امکان نه وي، موږ به خپل ځانګړی عملیات جاري ساتو.»
د امریکا ولسمشر دونالد ترمپ د تېرې میاشتې په وروستیو کې هم پر پوتین غوصه شوی و او هغه ېې «لیونی» بللی و. ترمپ دغه غبرګون وروسته له هغې ښودلی و چې پر اوکراین د روسیې په یوه برید کې لږ تر لږه ۱۳ کسان ووژل شول. ترمپ هغه وخت هم پر مسکو د تحریمونو د ډېرولو ګواښ کړی و.
له آرشیف څخه: