پاکستان: په بلوچستان کې درې سندي سلمانان وژل شوي دي
۱۴۰۳ اسفند ۲۰, دوشنبه
د دوشنبې په ورځ د بلوچستان له مرکز کویټې څخه ترلاسه شوو رپوټونو په حواله دغه درې سلمانان پاکستانیان ول چې له سند ایالت څخه دلته کډه او میشت شوي ول او د سلمانانو په توګه یې کار کاوه.
په بلوچستان کې اکثره داسې کسان چې له نورو ځایونو ورغلي دي پنجابیان بلل کیږي او د بریدونو ښکار کیږي. دا ډول غیر محلي پاکستاني کارګر د ملت پاله بلوڅ وسله والو له خوا په دې تورن کیږي چې د شخصي ګټو له پاره دې ولایت ته مخه کوي او له دې امله هدف ګرځول کیږي.
وژل شوي سلمانان سندیان ول
د پنجګور یوه پولیس چارواکي محمد زاهد، اسوشیټيډ پرس خبري آژانس ته وویل: «په دې برید کې درې سندي سلمانان وژل شوي دي.»
بلوچستان چې له ایران او افغانستان سره ګډه پوله لري، هلته کډه شوو سلمانانو باندې دا تور لګول کیږي چې دوی د بیلتون غوښتونکو پر ضد د پاکستان امنیتي ځواکونو ته جاسوسي کوي.
د پولیسو چارواکي محمد زاهد په وینا: «د یکشنبې په ماښام په دې برید کې وسله وال کسان چې پر موټر سایکل سپاره ول، د یوه سلماني دوکان ته ورننوتل او هلته یې ډزې پيل کړې.» تر اوسه پورې کومې وسله والې ډلې د دې برید مسئولیت نه دی منلی.
بلوچ ازادي بخښونکی پوځ تر ټولو فعاله وسله واله ډله
تیره میاشت هم بلوچ وسله والو یو مسافر وړونکی بس درولی و او پکې سپاره پنځه پنجابي کارګران یې وژلي ول. وسله والو تر وژلو مخکې د هغوی د هویت اسناد کنترول کړي ول او ډاډ یې ترلاسه کړی و چې دغه کسان د پاکستان د کومې سیمې پورې تعلق لري.
پر دې سربیره تیر کال په اپریل کې هم ۱۱ او بیا تر هغې وروسته په می میاشت کې ۶ پنجابي کارګر وژل شوي وو.
په همدې منځ کې د بلوچستان په بولان ولسوالۍ کې پولیس افسر سید دلاور وویل چې پرون د یکشنې په ورځ په یوه بله پيښه کې له بلوچ وسله والو سره د ډزو په تبادله کې د پاکستاني پوځ دوه عسکر وژل شوي او یو بل ټپي شوی دی.