پاکستان: ځانمرګي برید کې لږ تر لږه ۱۶ عسکر وژل شوي
۱۴۰۴ تیر ۷, شنبه
د پاکستان د خیبرپښتونخوا ایالت په شمالي وزیرستان ولسوالۍ کې یوه حکومتي چارواکي چې نه یې غوښتل نوم یې واخیستل شي وویل: «یوه ځانمرګي بریدګر له چاودیدونکو توکو څخه خپل ډک موټر له پوځي کاروان سره جنګولی دی.»
هغه وویل چې ۱۶ سرتیرو خپل ژوند له لاسه ورکړ او د مړو پخوانی شمیر له ۱۳ کسانو څخه لوړ شوی دی.
په سیمه کې د پولیسو یوه افسر د فرانسې خبري آژانس ته وویل: «د چاودنې له کبله د دوو کورونو چتونه ونړیدل او د شپږو ماشومانو د ټپي کیدو سبب شو.»
د دې برید مسولیت د پاکستاني طالبانو(TTP) ډلې پورې اړوند د حافظ ګل بهادر د ځانمرګي بریدونو وسله والې څانګې په غاړه اخیستی دی.
د کله راهیسې نه چې طالبان په ۲۰۲۱م کال کې په کابل کې یو وار بیا واک ته رسیدلي دي، پاکستان له افغانستان سره په خپلو سرحدي سیمو کې د شدید تاوتریخوالي شاهد دی.
دا په داسې حال کې ده چې د اسلام آباد حکومت پر خپل لویدیځ ګاونډي هیواد افغانستان تور لګوي چې پر پاکستان د برید کولو له پاره ترهګرو ته له خپلې خاورې څخه د استفادې کولو اجازه ورکوي. خو طالبانو تل دغه تورونه رد کړي دي.
د فرانسې خبري آژانس (AFP) په حواله د روان میلادي کال د پیل راهیسې د پاکستان په خیبر پښتونخوا او بلوچستان ایالتونو کې شاوخوا ۲۹۰ کسان چې اکثره یې د پاکستان امنیتي ځواکونه ول، د هغو وسله والو په بریدونو کې وژل شوي دي چې د پاکستان د حکومت پر وړاندې جنگیږي.