زیلنسکي: پر کیف حملې ښيي چې پوتین سوله نه کوي
۱۴۰۳ بهمن ۲۴, چهارشنبه
ولوديمير زیلنسکي وويل چې په دغو حملو کې یو تن وژل شوی او د یو ماشوم په ګډون لږ تر لږه ۴ تنه نور ټپیان شوي دي. هغه وویل چې په دغو حملو کې د استوګنې اپارتمانونو بلاکونه، دفتري ودانۍ او ملکي زیربناوې په نخښه شوي دي.
د اوکراین ولسمشر تر دغو حملو وروسته پر ټولنیزې رسنۍ ولیکل چې د روسيې ولسمشر ولادیمیر پوتین د «سولې له پاره چمتو نه دی... هغه د اوکراینیانو وژنې او د ښارونو له منځه وړلو ته ادامه ورکوي.»
په کیف کې د فرانسې خبري آژانس خبريالانو ویلي چې په دغه ښار کې ېې د چاودنو غږونه اورېدلي او له ویجاړیو ډکه یوه کوڅه کې ېې یو مړی لیدلی دی.
زیلنسکي ویلي: «یوازې ځواکمن ګامونه او فشار کولی شی د روسيې تروریستي کړنې ودروي.» هغه زیاته کړې: «موږ په اوس وخت کې اتحاد او د دغې جګړې د پای له پاره مبارزه کې د ټولو متحدینو ملاتړ ته اړتیا لرو.»
د اوکراین هوايي ځواکونو ويلي چې شپږ روسي توغندي او د ۱۲۳ ډرونونو له ډلې ۷۱ یې راغورځولي چې په هغو کې د ایران ساخت شاهد ډرونونه هم شامل دي.
روسيې پر اوکراین نژدې درې کاله مخکې د ۲۰۲۲م کال د فبروري په ۲۴مه پوځي یرغل وکړ. په امریکا متحده ایالاتو کې د ډونالد ترمپ په راتلو سره د مسکو او کیف تر منځ د روغې جوړې له پاره ګونګسې ډېرې شوي دي. ترمپ ويلي دي چې په اوکراین کې د جګړې پای ته رسول غواړي.
له آرشیف څخه (17.02.2023):