پاکستان: هرې خوا د شدیدو بارانونو او سیلابونو خطر دی
۱۴۰۴ شهریور ۸, شنبه
د پاکستان د هوا پيژندنې ادارې په حواله د اګست په ۳۰ او ۳۱ نیټو کې د احتمالي بارانونو او سیلابونو په سبب په غرنیزو سیمو کې د لارو د بندیدو او د خامه او کمزورو ودانیو د زیانمنیدو انديښنه موجوده ده.
په پاکستان کې مسافر او سیلانیانو ته له احتیاط څخه کار اخیستنې او د هوا له تازه وضعیت څخه د ځان خبرولو سپارښتنه شوې ده.
د اټکلونو له مخې په روان کال کې له معمول څخه زیاتو ورښتونو په سبب ځمکې ښویدنې او سیلابونو کې د جون میاشتې راهیسې تر اوسه پورې په دغه هیواد کې له ۸۰۰ ډیرو انسانانو خپل ژوند له لاسه ورکړی دی.
روانه اونۍ تر شدیدو بارانونو وروسته د هند له طرف څخه ورغلو سیلابونو د پاکستان د ۲۵۵ میلیونه نفوس نږدې نیمایي یې اغیزمن کړي دي. د روانې اونۍ په پای کې هم د شدیدو بارانونو وړاندوینه شوې ده چې په هغې کې له هند سره په سرحدي ښار لاهور کې د ښاري سیلاب د زیاتیدو خبرداری شامل دی.
د پنجاب د اطلاعاتو ایالتي وزیرې عظما بخاري وویل چې سیندونو ته نږدې ۱،۴ میلیونه اوسیدونکي سیلابونو اغیزمن کړي دي، په داسې حال کې چې ۲۶۵ زره کسان د خپلو کورونو پریښودو ته اړ شوي دي.
په پاکستان کې له بحران سره د مبارزې ملي ادارې په حواله په تازه موسمي بارانونو کې لږ تر لږه ۱۳ کسانو خپل ژوند له لاسه ورکړی دی.
د ټول ایالت په کچه له ۳۰۰ ډیر مرستندویه مرکزونه جوړ شوي دي، څو بې کوره شوو کسانو ته پناه ځای برابر کړي.