په عراق کې د امریکا هوايي حمله کې د داعش يو مشر وژل شوي
۱۴۰۳ اسفند ۲۵, شنبه
د امریکايي ځواکونو مرکزي قوماندانۍ، سينتکام، د جمعې په ورځ په یوه اعلامیه کې وویل چې په عراق کې ېې د داعش ضد دغه هوايي حمله د پنجشنبې په ورځ له عراقي چارواکو سره په همکاري کړې ده.
سینتکام په دغه حمله کې د وژل شوي داعشي مشر عبدالله مکي مصلح الرفاعي په نوم یاد کړی چې په ابو خدیجه يې هم شهرت درلود. په اعلامیه کې الرفاعي د داعش یو موثر او عملیاتي شخص په توګه ښودل شوی دی.
نور ولولئ: ترمپ: د کابل پر هوايي ډګر د بريد طراح نيول شوی
سینتکام په دې هکله په یوه اعلامیه کې ويلي: «ابو خدیجه د اسلامي دولت د تر ټولو لوړپوړي تصمیم نیونکي په توګه، د نړۍ په سطحه د اسلامي دولت له خوا د عملیاتونو، لوژستیک او پلان جوړونې مسئول او د دغه جهاني سازمان د مالي امکاناتو په برابرولو کې د پام وړ نقش ودرلود.»
د سینتکام قوماندان، مایکل اریک کریلا وویل چې ابو خدیجه د نړۍ په سطحه د داعش ډلې د تر ټولو مهمو غړو څخه یو و.
نور ولولئ: آیا داعش د سوریې سیاسي راتلونکي ته گواښ دی؟
هغه وویل: «موږ به د تروریستانو وژلو او د هغوی سازمانونو له منځه وړو ته ادامه ورکوو کوم چې په سیمه او له هغې ورهاخو زموږ هېواد امریکا متحده ایالات، متحدین او شریک پرسونل مو ګواښي.»
نور ولولئ: په سومالیا کې د داعش پر ترهګرو د امریکا هوایي برید
د امریکا متحده ایالاتو ولسمشر، دونالد ترمپ، پر خپله ټولنیزه رسنۍ تروت لیکلي چې ابو خدیجه د واشنګټن د «زړورو جنګیالو له خوا په بې رحمۍ ښکار شو.»
هغه زیاته کړې: «د هغه بدبخت ژوند د اسلامي دولت د نورو غړو سره د عراقي حکومت او کردي سیمیز حکومت په همغږۍ سره پای ته ورسېد.»