یو قطري خیریه بنسټ کندهار کې روغتون جوړوي
۱۴۰۴ مرداد ۳۰, پنجشنبه
د طالبانو د عامېروغتیا وزارت په داسې حال کې د یو ۴۰۰ بستريز روغتون د قرارداد خبر ورکوي چې تر دې مخکې د روغتیا نړېوال سازمان خبرداری ورکړی و چې په افغانستان کې ۸۰ سلنه روغتيايي خدمات په ټپه درېدلي دي.
دغه روغتون د قطر د یو خیريه بنسټ پر مالي ملاتړ جوړيږي چې رغنیزې چارې به ېې په دوه نیمو کلونو کې بشپړې شي.
د طالبانو د عامې روغتیا وزیر، نور جلال جلالي، وويل: «موږ غواړو چې د نوې ملي پالیسۍ پر اساس، روغتيايي خدمات په عادلانه توګه پراختیا ومومي او د خلکو د لاسرسي وړ وګرځي.»
کندهار او ګاونډي ولایتونه
د باختر خبري آژانس چې د طالبانو تر مدیریت لاندې فعالیت کوي، خبر ورکوي چې په دغه روغتون کې به د ښځو، ماشومانو او همدارنګه د داخله ناروغیو خدمات وړاندي کيږي.
جلالي د قرارداد لاسلیک کولو په مراسمو کې وویل چې د دغه روغتون په جوړېدو سره به د کندهار او د هغه د ګاونډي ولایتونو اوسېدونکي له ځانګړو روغتيايي خدماتو برخمن شي.
په کابل کې د قطر شارژدافیر، مردف علی القاشوطي، هم په مراسمو کې حضور درلود. هغه هيله مندي وښوده چې د دغه روغتون په جوړېدو سره به د ماشومانو او مېندو د مرګ و مير په کچه کې کموالی راشي.
هغه زیاته کړه چې دغه روغتون به نه یوازې د کندهار، بلکې د هغه د ګاونډيو ولایتونو او د افغانستان د جنوبي سیمو اوسېدونکو ته روغتيايي خدمات وړاندې کوي.
د روغتیايي خدماتو د کموالي خبرداری
نړېوالو مرستندوی بنسټونو د تېرو څلورو کلونو په جریان کې چې طالبان پر افغانستان حاکم دي، په دغه هېواد کې د روغتيايي خدماتو د پاشل کېدو له احتمال څخه خبرداری ورکړی دی.
د ملګرو ملتونو د بشري مرستو د همغږۍ دفتر په جون میاشت کې یو راپور خپور کړ او په هغه کې ېې ویلي وو چې د مالي امکاناتو د کمښت له وجې ېې په افغانستان کې له ۲۴۰ ډېر روغتيايي مرکزونه رخصت شوي دي. په راپور کې ویل شوي و چې د دې کار په نتيجه کې ۳ میلیونه خلکو روغتيايي خدمات له لاسه ورکړي دي.
د روغتیا نړېوال سازمان هم د روان کال په مارچ میاشت کې وویل چې د امریکا متحده ایالاتو د مرستو په قطع کېدو سره ېې په افغانستان کې ۸۰ سلنه خدمات متوقف کیږي.
د رپوټونو پر اساس، د افغانستان روغتيايي سیستم د لازمو تجهیزاتو او متخصصو ډاکټرانو له کمښت سره مخ دی.