د پاکستاني طالبانو په برید کې څلور امنیتي ځواکونه وژل شوي
۱۴۰۳ اسفند ۱۹, یکشنبه
د پاکستاني پولیسو یوه چارواکي د یکشنبې (د مارچ میاشتې ۹ نیټه) په ورځ وویل چې دغه برید د خیبر پښتونخوا په کُرمې ولسوالۍ کې شوی دی. یوه پولیس چارواکي د نوم پټ ساتل کیدو په شرط د فرانسې خبري آژانس ته وویل: «ملیشه و چې په شدید ډول په وسلو سمبال ول د یکشنبې په سهار برید پیل کړ»
هغه زیاته کړه: «لږ تر لږه څلور امنیتي ځواکونه شهیدان شوي او اووه نور ټپیان دي.» د کله راهیسې نه چې طالبان یو وار بیا په افغانستان کې واک ته رسیدلي دي، په پاکستان کې تاوتریخوالی زیات شوی دی.
د پاکستان تحریک طالبان یا «ټي ټي پي» د پاکستان په شمال لویدیځ کې یوه تر ټولو فعاله ډله ده چې په منظم ډول د دغه هیواد امنیتي ځواکونه په نښه کوي.
د اسلام آباد حکومت د کابل پر اوسنیو واکمنانو تور لګوي چې د هغو ترهګرو د لمنځه وړلو له پاره اړین اقدامات نه کوي چې د دوی په خاوره کې یې پناه اخیستې ده او له هغه ځایه د پاکستان په خاوره کې بریدونه پلانوي. په کابل کې د طالبانو اداره د پاکستان دغه تورونه ردوي.
تیره اونۍ د خیبر پښتونخوا په بنو ولسوالۍ کې پر یوه پوځي اډې د موټر په وسیله ځانمرګي برید په پایله کې ۱۳ ملکي وګړي او پنځه سرتیري وژل شوي و.
د امنیتي څیړنو او مطالعاتو مرکز چې مقر یې په اسلام اباد کې دی د رپوټ پر بنسټ، ۲۰۲۴م کال په تیره یوه لسیزه کې د پاکستان له پاره چې ۲۵۰ میلیونه نفوس لري، یو تر ټولو خونړی کال و. په دې کال کې بریدونه ډیر شول چې په پایله کې یې ۱۶۰۰ کسان ووژل شول.