د هند او پاکستان د ملي امنيت مشاروينو ترمنځ تماسونه
۱۴۰۴ اردیبهشت ۱۸, پنجشنبه
د کشمیر په پهلګام سيمه کې د بريد په غبرګون کې پر پاکستان باندې د هند تر راکټي بريدونو وروسته د دواړو هېوادونو له لوري د يو او بل پر وړاندې د بيانيو او څرګندونو پر زياتیدو سربیره هم، ديپلوماتيکې لارې پرانيستي بريښي. د پاکستان د بهرنیو چارو وزير اسحاق ډار، د هند او پاکستان د ملي امنيت د مشاورينو ترمنځ تماسونه تائيد کړي دي.
د ترکیې له دولتي رسنۍ «ټي آر ټي ورلډ» سره د مرکې پر وخت اسحاق ډار، د پردې تر شا ديپلوماسۍ په اړه د يوې پوښتنې په ځواب کې تائيد کړه چې د دواړو هېوادونو د لوړپوړو امنيتي چارواکو ترمنځ تماس نيول شوی دی. هغه وويل: «هو، دواړو هېوادونو سره تماس نيولی دی.»
اړونده موضوع: هندوستان وايي پاکستان پرې د «ډرونونو او توغندويو» حملې کړي
اسحاق ډار، وويل چې «د هند او پاکستان د ملي امنيت مشاورين سره په تماس کې دي.» خو نوموړي نور جزيات ور نه کړل.
په دې منځ پاکستاني رسنيو د يوه لوړپوړي چارواکي له قوله ويلي دي چې د ملي امنيت مشر جنرال عاصم ملک، چې د پاکستان د استخباراتي ادارې «آی اس آی» مشر هم دی، له خپل هندي سيال اجيت ډووال، سره خبرې کړي دي. د رسنيو په حواله دا د ترینګلتیا د راکمولو د هڅو برخه ده.
ذکر شوي چارواکي وويل چې د بحران پر وخت د تماس دا ډول سرچینې اړينې دي.
داسې انګیرل کيږي چې د پردې تر شا د نړيوالو او سيمه ایزو نقش لرونکو تر سفارتي هڅو وروسته د دواړو هېوادونو د ملي امنيت مشاورینو سره تماس نيولی دی.
تر دې مخه د امريکا متحده ايالاتو د بهرنيو چارو وزیر مارکو روبيو، چې د امريکا د ملي امنيت آژانس «ان اس ای» مشري هم پر غاړه لري، هم د هند د راکټي بريدونو سملاسي وروسته د هند او پاکستان د ملي امنيت له مشاورينو سره خبرې اترې کړې وې.
دواړو غاړو ډزو ته دوام ورکړی
د چهار شنبې په ورځ د هند له لوري تر توغندیز بريد وروسته د روان تاوتريخوالي په ترڅ کې په ټولیزه توګه دواړو لوريو ته تر اوسه د لږ تر لږه ۴۳ کسانو د وژل کيدو خبرونه ورکړل شوي دي.
اسلام آباد وایي چې د هند په بريدونو او د پولې له بلې غاړې څخه د ډزو په نتیجه کې تر ۳۰ ډېرو وګړي وژل شوي. نوي ډيلي هم د پاکستان له لوري په ډزو کې د لږ تر لږه ۱۲ کسانو وژل کیدل تائيد کړي.
اړونده موضوع: ډیری هوايي شرکتونه د پاکستان له فضا څخه له پروازونو ډډه کوي
د فرانسې د خبري آژانس په حواله د هندوستان پوځ وايي چې تېره شپه د پاکستان تر ادارې لاندې کشميرد «کنترول پر کرښه» پاکستاني او هندي عسکرو پر يو بل باندې د سپکو او درنو وسلو ډزې وکړې.
په دې منځ کې د پاکستان پوځ د هند د ۱۲ بې پېلوټه الوتکو د خنثی کولو او را اچولو خبرونه هم ورکړي دي.
د هند تر ولکې لاندې کشمير په سرينګر او ګاندر بل په سيمه کې يو شمیر کسانو دويچه ويله اردو ته ويلي دي چې د نوي وضعيت له کبله یې ستونزې ډېرې شوي دي. د جګړې د ترسره کیدو انديښې ته په کتو سره خلکو د اړينو توکو په ذخیره کولو پېل کړی دی. د سيمې اوسيدونکي وايي چې ټوله شپه یې د ډزو غږونه اوريدل.