ورځپاڼه: پاکستان باید له ترهګرو سره خپلې اړیکې پای ته ورسوي
۱۴۰۴ اردیبهشت ۶, شنبه
د کشمیر په نا ارامه سیمه کې له ترهګریز برید وروسته د «نویه زوریخر څایټنګ» رسنۍ د شنبې (د اپریل میاشتې ۲۶ نیټه) په ورځ د هند او پاکستان ترمنځ ترینګلتیا په حواله لیکلي دي: «لا دمخه څو واره د دغو دواړو اټومي قدرتونو پوځونه سره جنګیدلي. خو هند اوس جګړه نه غواړي. ځکه د داخلي سیاست په برخه کې د هند له پاره ډیر څه په خطر کې ولیدلی شي. دغه هیواد غواړي وده او پرمختګ وکړي، څو په نړیواله کچه خبره یې واوریدل شي.
په پاکستان کې د ترهګرو د ځالو پر وړاندې د هدفمندو بریدونو ترسره کیدل، لکه په ۲۰۱۹م کال کې په کشمیر کې پر پولیسو تر برید وروسته په بشپړ ډول د تصور وړ دي. هند به د دې کار له پاره د امریکا ملاتړ له ځان سره ولري.
هندوستان دا نه شي زغملی چې پاکستان دې کلونه وروسته له هغې چې اسامه بن لادن د دغه هیواد په یوه پوځي ښار کې د امریکایانو له خوا ووژل شو، اوس هم لکه د پخوا په څیر د ترهګرو د ځالې په توګه باقي پاتې شي.
پاکستان په هغه وخت کې هم ویلي و چې د نیویارک د بریدونو پلانوونکي (اوسامه بن لادن) د اوسیدو ځای په هکله معلومات نه لري، دقیق لکه نن چې د پاکستان حکومت انکار کوي چې د کشمیر په برید کې لاس نه لري. اوس د دې وخت را رسیدلی دی چې د پاکستان پوځ سوګوند وکړي چې له ترهګرو سره خپلې اړیکې پرې کوي.»