آلمان: په درو کلونو کې د تابعيت اخیستو مقررات لغوه کیږي

د آلمان نوی ائتلافي حکومت چې محافظه پال مسيحي ديموکرات (CDU) او مسيحي سوسيال (CSU) ګوندونه او سوسيال ديموکرات ګوند (SPD) پکې شامل دي، غواړي په دريو کلونو کې د «ښو ادغام شويو» کډوالو له پاره د آلمان د تابعيت ترلاسه کولو ګړندۍ لاره لغوه کړي. دا خبره د دغه ګوندونو ترمنځ په روانه اونۍ کې رامنځته شوي «ائتلافي تړون» کې شوې ده. 

«توربو» تابعيت به نور نه وي

په دريو کلونو کې د آلمان د تابعيت د ترلاسه کولو مقررات په تېر جون میاشت کې تر هغه وروسته پلي شول چې د سوسيال ديموکرات، زرغون او لیبرال ګوند په شراکت پخواني ائتلافي حکومت د آلمان د تابعيت اخیستنی په قانون کې اصلاحات تصويب کړل.

په دريو کلونو کې د تابعيت اخیستو له پاره عريضه کوونکی بايد د آلماني ژبي پرمختللی د «سي ۱» ژبې کورس سند ولري او همدا شان د آلمان په ټولنه کې په ښه توګه د ادغاميدو په برخه کې یې نورې ښې لاسته راوړنې هم بايد لرلي وي، لکه رضاکارانه کار او يا د کار او زده کړو په برخه کې ښی ځليدلی وي.

اړونده موضوع: په ۲۰۲۳ کال کې څه باندې ۲۰۰ زرو تنو د جرمني تابعیت ترلاسه کړی

د آلمان محافظه پال مسيحي ديموکرات اتحاد او د بایرن ايالت څخه یې مسيحي سوسيال متحد ګوند تل په دريو کلونو کې د تابعيت د اخيستو پر تګلاره نيوکې کولی او هغه یې «توربو» يا چټک تابعيت باله. ځيني محافظه پال انتقاد کوونکي ادعا کوي چې په آلمان کې درې کاله اقامت د آلمان د تابعيت ترلاسه کولو له پاره ډېره لنډه موده ده.

خو د نوي ائتلافي تړون پر اساس کډوال کولی شي چې د پنځو کلونو تر دايمي اقامت وروسته او د آلماني ژبې د «بي ۱» سند سره د آلمان تابعیت ته عريضه وړاندې کړي. دا د تېر کال د اصلاحاتو سره سمون لري. پر دې سربیره دوه ګوني تابعيت ته هم اجازه ورکړل شوې ده.

دوه ګونی تابعيت به پر ځای پاتی وي

د تېر کال د اصلاحاتو تر مخه د آلمان د تابعيت ترڅنګ د يوه داسې بل هېواد د تابعيت درلودو تر ډېره اجازه نه وه چې د اروپايي ټولنې غړی نه وي. خو د دغه اصلاحاتو په عملي کیدو سره د آلمان د تابعيت ترلاسه کوونکو شمير ډېر شو چې علت یې په آلمان کې د ميشتو په خټه ترکي وګړو ليوالتيا وه.

که څه هم چې محافظه پالو لکه د سي ډي يو د ګوند مشر او د آلمان احتمالي راتلونکي صدراعظم فريدرش مېرڅ، د دوه ګوني تابعيت پر مفکوره باندې نیوکې کولی، خو اوس داسې ښکاري چې د اس پي ډي ګوند سره په ائتلافي خبرو کې پر دغه مسئله جوړجاړی شوی وي.

د دوه ګونو تابعيت لرونکو څخه د تابعيت بیرته اخیستل نور تر غور لاندې نه دي

د آلمان راتلونکی ائتلافي حکومت له هغو وګړو څخه چې دوه ګونی تابعيت لري، د آلمان تابعيت د بیرته اخیستو نظر نه تعقيبوي.

تر دې دمخه ګوندونه په دې اړه غور کاوه چې آيا د آلمان تابعيت له هغو کسانو څخه چې د ترهګرۍ د ملاتړو، یهودي ضد او يا داسې افراطيانو په توګه مشخص شوي وي چې«د بنسټیز آزاد او ديموکراتيک نظم د له منځه وړلو غږ کوي»، بیرته اخيستل کيدلی شي او که نه.

اړونده موضوع: اروپايي هيوادونه د تابعيت ورکولو شرايط څنګه تنظيموي؟

دا نظر د مسيحي ديموکرات او مسيحي سوسيال ګوندونو له خوا وړاندي شوی وو او د سوسيال ديموکرات ګوند له خوا پرې تل نيوکې کيدلی. د آلمان د مهاجرو ټولنو هم دا وړاندیز غندلی وو.

د دې پر ځای په ائتلافي تړون کې ويل شوي دي چې ګوندونه به د هغو کسانو د اخراجولو په اړه ممکن بدلونونه واروزي چې د «بنسټیز آزاد او ديموکراتیک نظم د له منځه وړلو غږ کوي» خو دا به پر هغو صدق کوي چې د آلمان تابعيت ونه لري او نه پر هغو کسانو چې دوه ګونی تابعيت لري.