د ناټو غړو هېوادونو د دفاعي بودجې پر ۵ سلنه لوړولو توافق کړی
۱۴۰۴ تیر ۲, دوشنبه
د ناټو غړيو هېوادونو د يکشنبې په ورځ (د ۲۰۲۵م کال د جون ۲۲) پر دې توافق وکړ چې خپل دفاعي لګښتونه به د کورني ناخالص توليد ۵ سلنې ته لوړ کړي، هغه حد چې ولسمشر دونالد ترمپ، یې د اوږدې مودې راهېسې د ترلاسه کولو هڅه کوله. ترمپ، د نورو امريکايي ولسمشرانو په پرتله دا شکایت ډېر په زغرده کاوه چې هېواد یې له ډېرې اوږدې مودې راهېسې د اروپا امنيت پر غاړه لري.
هسپانیا هڅه کوله چې د ناټو د دې پریکړې مخه ونيسي خو د بودجې له ډېرولو څخه د دغه هېواد د معافيت په اړه تر توافق وروسته یې خپل مخالفت ختم کړ.
اړونده موضوع: د ناټو عمومي منشي د دفاعي وړتیاوو ۴۰۰ سلنه زیاتوالی غواړي
انتظار کیږي چې د ناټو غړي هېوادونه د دغه سازمان په هغه دوه ورځنۍ غونډه کې چې د سې شنبې له ورځې څخه په دنهاک کې پيليږي، د دفاعي بودجې ۵ سلنه لوړولو په پلوۍ رسمي رايه ورکړي.
د دې توافق تر تصویب وروسته بايد د هسپانیا په استثنا ټولو غړيو هېوادونو تر ۲۰۳۵م کال کاله پورې د ۵ سلنه هدف ترلاسه کړی وي.
د دې توافق پر اساس د ملي ناخالص توليد لږ تر لږه ۳،۵ سلنه بايد د پوځ پر اصلي اړتياو مصرف شي، په داسې حال کې چې ۱،۵ سلنه نوره برخه یې د اړوندو لګښتونو له پاره ځانګړې کیدلی شي.
د هسپانیا استثنی کول
د هسپانیا لومړي وزير پيدرو سانچيز، له دې توافق سره مخالفت کړی وو. د ناټو عمومي منشي مارک روټه، ته په يوه ليک کې هغه ويلي ول چې د پنځه سلنه کچه نه يوازې «غير منطقي بلکې د اړونده هدف ترلاسه کولو په لار کې خنډ جوړونکې هم ده.»
سانچز، د هسپانيا په تلویزيون کې د يوې وينا پر مهال تر دې هم مخکې ولاړ او ویې ویل: «۵ سلنه لګښتونه به نامتناسب او غير ضروروي وي.»
اړونده موضوع: آلمان غواړي د اروپا «تر ټولو قوي» پوځ ولري
نوموړي د دې په زياتولو سره چې هسپانیا کولی شي د خپل ناخالص توليد ۱،۲ سلنې په مصرولو سره د پرسونل او تجهیزاتو په برخه کې د ناټو په مقابل کې خپل ټول تعهدات پر ځای کړي، وويل: «موږ د نورو هېوادونو د خپلو دفاعي لګښتونو د لوړولو مشروع تمايل ته درناوی لرو خو موږ به دا کار ونه کړو.»
د ناټو د ټولو غړيو هېوادونو په منځ کې هسپانیا له نسبي پلوه يو له هغو هېوادونو څخه دی چې تر ټولو لږ دفاعي لګښت لري.
سانچز، چې حکومت یې د فساد د يوې افتضاح له کبله په هيواد کې له سياسي فشارونو سره مخامخ دی، په ائتلافي حکومت کې یې شريک ډېر کين اړخه اتحاد سومار، هم په ښکاره توګه د پوځي بودجې د لوړولو مخالفت کوي.