په انګلیس کانال کې یوه مهاجر خپل ژوند له لاسه ورکړی دی
۱۴۰۴ مرداد ۴, شنبه
د فرانسې په شمال کې د پاس- دي کالیز ډیپارټمن د چارواکو په حواله په یوې کوچنۍ کښتۍ کې یو مړی موندل شوی چې بریتانیې ته یې د اوښتو هڅه کړې وه او بیرته د اِکواحین ساحل ته ستون شوی و. څارنوالۍ څیړنې پيل کړي دي چې د دغه کس د مړیني علت په دقیق ډول معلوم کړي.
د فرانسې د کورنیو چارو وزارت له خوا د ورکړل شوو معلوماتو له مخې په روان میلادي کال کې لږ تر لږه ۱۷ کسانو بریتانیي ته د مانش کانال د تیریدو په هڅه کې خپل ژوند له لاسه ورکړی دی. تیر کال بیا ۷۸ کسانو خپل ژوند له لاسه ورکړی و چې دا له ۲۰۱۸ م کال را په دیخوا تر ټولو لوړ شمیر دی.
فرانسه او بریتانیا د کلونو راهیسې هڅه کوي چې له دې مسیر څخه د تیریدونکو کسانو مخه ونیسي. د جولای په اوایلو کې بریتانیې اعلان وکړ چې ټول هغه مهاجر به بیرته فرانسې ته واستوي چې د مانش یا انګلیس کانال له لارې دغه هیواد ته ورځي.
د هر بیرته ستنول کیدونکي مهاجر په بدل کې بریتانیا غواړي یو بل مهاجر په قانوني توګه ومني یا په بل عبارت خپلې خاورې ته ورته د داخلیدو اجازه ورکړي.
فرانسه همدارنګه غواړي دا وارزوي چې ایا امنیتي ځواکونه یې په راتلونکي کې کولی شي له ساحل څخه تر ۳۰۰ مترو پورې سمندر کې د مهاجرو د کوچنیو کښتیو مخه ونیسي.
د نړیوالو سمندري قوانینو له مخې اوبو ته د کښتۍ داخلیدو سره سم یوازې په هغه صورت کې د مداخلي اجازه لري، کله چې له خطر سره مخامخ وي.