فريدرش میرڅ: آلمان بیرته نړيوال دريځ ته راستون شوی
۱۴۰۴ تیر ۴, چهارشنبه
دآلمان صدراعظم فريدرش میرڅ، دا څرګندونې د سې شنبې په ورځ د آلمان په بندستاګ يا پارلمان کې د بهرنۍ تګلارې د خپلې کليدي وينا په ترڅ کې په دنهاک کې د ناټو په سرمشریزه کې د ګډون له پاره تر روانېدو څو ساعته مخکې وکړې.
میرڅ پارلمان ته څه وويل؟
فريدرش میرڅ، وويل چې آلمان او د ناټو ائتلاف یې په دې آند دی چې روسيه په ځانګړي توګه د اروپا او اتلانتيک د سیمې امنيت او آزادي «په فعاله او تهاجمي» په توګه ګواښي.
نوموړي ټينګار وکړ چې آلمان کولی شي په راتلونکو کلونو کې د خپلو ائتلافونو له لارې په نړۍ کې بېلا بېلو پرمختګونو ته په شکل ورکولو کې مرسته وکړي.
اړونده موضوع: آلمان غواړي د اروپا «تر ټولو قوي» پوځ ولري
میرڅ، وويل: «موږ په شريکه باید دومره قوي واوسو چې هیڅوک دا جرات ونه کړای شي چې بريد راباندې وکړي.»
صدراعظم میرڅ، وويل: «له همدې کبله موږ په يوه تاريخ وضعيت کې قرار لرو. په دې وضعيت کې آلمان باید مسئوليت پر غاړه واخلي او موږ دا کار کوو.»
نوموړي وویل چې «موږ به د ائتلافي کار خپله ونډه په عادلانه توګه ترسره او پر غاړه واخلو.» د میرڅ، په خبره دا به په دې معنا وي چې آلمان به «هغه ځانګړي اهداف پوره کړي چې له ائتلافي شريکانو سره مو پرې توافق کړی دی.»
میرڅ، چې د محافظه پالو په مشرۍ جوړ شوي حکومت یې تیره میاشت کار پېل کړ، وويل: «موږ خپلو نړيوالو شريکانو ته وښووله: تاسې پر موږ اعتبار کولی شي.»
نوموړي همدا راز وويل: «دې نوي پريکړنده [دريځ] ته نړيوال متوجې شوي او زموږ شريکانو او دوستانو یې تود هرکلی کړی.»
د ناټو او اروپايي اتحادیې د سرمشریزو د مخه د میرڅ وينا
میرڅ، دا وينا په داسې حال کې وکړه چې په روانه اونۍ کې دوه د لوړې کچې غونډې ترسره کیږي: په هالند کې د ناټو سرمشریزه چې پرون، سه شنبه پېل شوه او په بروکسل کې د اروپايي اتحادیې سرمشریزه.
میرڅ، وويل چې آلمان بايد له خپلو متحدينو سره په شريکه د راتلونکو کلونو پرمختګونو ته شکل ورکړي. خو په دې موخه دوو اساسي ځانګړتياو ته اړتيا ده: «موږ ځواک او اعتبار» دواړو ته اړتيا لرو، په داخل او خارج دواړو کې.»
اړونده موضوع: آلمان غواړي د ناټو د غښتلي کولو له پاره ۴ پرمختللي اوبتلونه واخلي
میرڅ، دا څرګندونې په داسې حال کې وکړې چې حکومت یې د سې شنبې په ورځ د ریکارډ کچې لوړ پور په اخیستو سره د نويو سترو پانګونو ژمنه وکړه.
د نوموړي کابينې خپل د بودجې پلانونه د هېواد پارلمان ته وړاندې کړل چې موخه یې د اقتصاد بیرته پياوړي کول او د پوځ غښتلي کول دي.
په دې پلانونو کې چې د صدراعظم فريدرش میرڅ، کابينې تصويب کړي دي، د ۲۰۲۵م کال د بودجې مسوده چې له اوږدې مودې راهېسې ځنډيدلې وه او همدا راز تر ۲۰۲۹م کال پورې غځيدلی مالي چوکاټ شامل دي.
د روان کال د بودجې پروسه تېر کال د پخواني حکومت د سقوط له کبله ځنډول شوې وه.