پولیسو د لیورپول په پيښه کې د ترهګرۍ انګیزه رد کړې
۱۴۰۴ خرداد ۶, سهشنبه
د مرسیساید سیمې د پولیسو د مشر مرستیال جیني سیمس، وویل چې تحقیق کوونکي په دې باور دي چې دغه پيښه یوه «انزوایي حادثه» ده. داسې شواهد نه دي موندل شوي چې په دې پيښه کې دې نور کسان هم ښکیل وي.
د پيښې په تړاو یو ۵۳ کلن بریتانوی نیول شوی دی. ۲۷ تنه ټپیان روغتون ته انتقال شوي چې د یوه ماشوم په ګډون د دوو کسانو روغتیایي وضعیت د انديښنې وړ ښودل شوی دی. دولس نور ټپیان د پيښې د ځای ترڅنګ د بیړنیو روغتیایي مرستو په خیمه تر درملنې وروسته کورونو ته استول شوي دي.
د سمیه ایز وخت مطابق د مازیګر څه باندې ۶ بجې وې چې یو خړ رنګه موټر د خلکو پر هجوم ور وځغلول شو، یوازې څو دقیقې مخکې مینه والو په هم دې ځای کې په یوه پرانیستي بس کې لوبغاړي هڅولي ول. د «واټر سټریټ» سړک تړل شوی و او یوه ژغورونکی هیلیکوتر ښکته شو.
د شدید باران سربیره لسګونو زره نندارچیان د انګلستان د فوټبال د شلمې اتلولۍ په مراسمو کې د ګډون کولو له پاره را ټول شوي و.
د مرسیساید د اطفایې مشر نیک سیارلې، وویل د یوه ماشوم په ګډون څلور کسان د موټر لاندې بند پاتې شوي ول چې باید را ایستل شوي وای. لومړي وزیر کیئر سټارمر، د پولیس او نورو ژغورونکو د خدماتو ستاینه وکړه.
سټارمر وویل چې په دې وحشتناکه پيښه کې د ټپي شوو کسانو درملنه او ملاتړ به وشي: «ټول هیواد د لیورپول تر شا ولاړ دی».