د جوبایدن لمړنۍ وینا: د «امریکا اوله» سیاست پای

جوبایدن د امریکا د نوي خارجي سیاست د توضیح په ارتباط خپله لمړنۍ بیانیه کي د پخواني جمهورریس، دونالد ترمپ د طریقې څخه فاصله ونیوله. هغه «ډیپلوماسي ته د ورګرزیدلو» په شعار سره وویل، چي نیت لري د خپلو اصلي متحدینو سره عنعنوي روابطو ته بیرته وروګرزي او هغه ته ادامه ورکړي.

بایدن وویل، چي امریکا تصمیم لري د بین المللي سیاست په ډګر کي د خپلو اروپايي متحدینو سره «اوږه په اوږه» مخته ولاړ سي او د امکان تر حده پوري د روسیې او چین څخه فاصله ونیسي.

بایدن وضاحت ورکړ، چي «موږ به خپل ارتباطات بیرته ورغوو» او امریکا متحده ایالات نیت لري د خپلو همیشګي متحدینو سره د فعالي  ډیپلوماسۍ د لاري پرمخ ولاړه سي. هغه وعده ورکړه، چي دموکراسي، ازادي، د بشر حقوق او د قانون حاکمیت به بیرته د امریکا د خارجي سیاست اصلي محور جوړ کړي. هغه د اوسنیو مهمو مسایلو، لکه اقلیمي تغیراتو په هکله د بین المللي همکارۍ پر ضرورت باندي ټینګار وکړ.

بایدن په خپله بیانیه کي د جرمني او ځینو نورو هیوادو څخه د خپلو نظامي قواوو د یوې برخي د ایستلو سره مخالفت وکړ. دا ټوله په دې معنی دی، چي امریکا د دونالد ترمپ د ډیرو فیصلو او تصامیمو څخه بیرته شاته کیږي.

بایدن همدارنګه وعده ورکړه، چي د یمن په داخلي جنګ کي به د سعودي عربستان په رهبرۍ د عربي اییتلاف څخه خپل ملاتړ ته خاتمه ورکړي. هغه ټینګار وکړ، چي«دغه جنګ باید پای ته ورسیږي.»

بایدن د مهاجرینو د سیاست په موضوع کي هم د ترمپ د تګلاري څخه فاصله ونیوله او ویې ویل، امریکا نیت لري ۱۲۵ زره مهاجر ومني. پداسي حال کي چي ترمپ تصمیم درلودی، دغه تعداد ۱۵ زرو ته راکم کړي.

د چین او روسیې څخه فاصله نیول

بایدن د خپل خارجي سیاست په رڼا کي د خپلوغربي متحدینو سره د فعالي همکارۍ تر څنګ پر روسیې او چین انتقاد وکړ اویې ویل، چي د دغو هیوادو څخه به فاصله ونیسي. هغه وویل، چي امریکا به تر دې وروسته د روسیې د تخریبونکو فعالیتونو، لکه« د امریکا په انتخاباتو کي د مداخلې، سایبري حملو او یا خپلو اتباعو مسموم کیدل» ونه زغمي.

هغه د ولادیمیر پوتین د سخت منتقد، الکسي ناوالني د ژرتر ژره ازادیدو غوښتنه وکړه .

بایدن همدارنګه وویل، چي امریکا به پسله دې د چین «د مخ پر ډیریدونکي هژمونۍ او قدرت طلبي »د سیاست په مقابل کي مقاومت وکړي. هغه د چین د تهاجمي خارجي تجارت څخه هم انتقاد وکړ. خو بایدن ددغو دواړو رقیبو هیوادونو سره په عین حال کي د بې وسلې کولو په ډګر کي  د همکارۍ پر ضرورت باندي ټینګار وکړ.