بيت المقدس: پر سرويس بريد کي ۶ کسان وژل سوي
۱۴۰۴ شهریور ۱۷, دوشنبه
د بيت المقدس په څنډه کي د دوشنبې په ورځ (د سپتمبر ۸) پر يوه سرويس موټر باندي د دوو وسله والو کسانو په بريد کي ۶ کسان وژل سوي او ۱۵ نور ټپيان سوي دي.
د اسرائيلي رسنيو د راپور له مخي دوو وسله والو کسانو يوه سرويس موټر ته تر ختلو وروسته پر مسافرو باندي فيرونه پيل کړل. د «اسرائيل تايمز» د راپور له مخي دوه يرغلګر چي پوليسو «ترهګر» بللي دي، د اردن سيند د لوېديځي غاړي فلسطيني اوسېدونکي ول.
پوليسو ويلي دي چي دغو يرغلګرو پر هغو کسانو هم ډزي کړي دي چي د سرويس په تمځای کي ولاړ ول. د راپورونو له مخي يوه عسکر او يوه غيرملکي مسلح له بريد سره سم پر يرغلګرو ډزي کړي. پوليسو تر اوسه پوري د بريد کوونکو په اړه نور جزئيات رسنيو ته نه دي وړاندي کړي. د پوليسو په وينا د بريد په ځای کي دوه وسله وال وژل سوي دي.
د اسوشېتيد پرس خبري آژانس د راپور له مخي دغه پيښه د شمال له خوا بيت المقدس ته پر غځېدلي جاده کي رامنځته سوې ده.
د پيښي له ځایه په خپاره سويو انځورونو کي ښوول کيږي چي د پيښي په سيمه کي خلک يوې او بلي خوا ته ځغلي. په دغه پيښه کي څو نور کسان ټپيان سوي دي چي ويل کيږي د ۷ کسانو وضعيت د اندېښنې وړ دی.
د اسرائيلو د لومړي وزير دفتر خبر ورکړی دی چي د بنيامين نتانياهو په حضور يې د «وضعيت د ارزوني» يوه غونډه رابللې ده.
د اسرائيل تايمز د راپور له مخي تروريستي ډلي حماس د يوې اعلاميې په خپرولو سره دغه مرګونی بريد ستایلی دی او هغه يې «اتل عمليات» بللي دي. حماس ترهګرې ډلې د بريد پړه پرغاړه نه ده اخيستې، خو د اردن سيند په لوېديځه غاړه کي يې له فلسطينيانو څخه غوښتي دي چي «د اشغالګرو او يهود مېشتي ښارګوټي پر وړاندي خپله مقابله شديده کړي».