امریکا د عراق - سوریې سرحدي سیمه بمبار کړې
۱۴۰۰ تیر ۷, دوشنبه
د پنتاګون ویاند جان کیربي، د یکشنبې په ماښام په واشنګټن کي خبر ورکړ چي د امریکا متحده ایالاتو پوځ د عراق او سوریې په سرحدي سیمه کي څو هغه هدفونه بمباري کړي دي چي ایران پلوه ملیشو استفاده ترې کوله.
د کیربي په خبره په عراق کي د امریکا پوځ د نظامي تاسیساتو څخه بې پیلوټه الوتکو هلته د ایران پلوه ملېشو پر تاسیساتو باندي بمبار کړی دی. د بمبار سوو ایران پلوه ملیشو دروهدفونه څخه دوه يې په سوریه او یو یې په عراق کي موقعیت لري.
کیربي اضافه کړه، چي هلته د نورو ترڅنګ وسلې ذخیره سوي دي. هغه د یوې متناسبي او دفاعي حملې خبره کړې او ویلي يې دي چي د هغه دلیل په عراق کي پر امریکايي نظامي هدفونو باندي د ایران پلوه ملیشو پرله پسې حملې دي.
پنتاګون اضافه کړې چي جمهور رئیس جو بایدن د دغو ملیشو پر هدفونو باندي د بمبار امر ځکه ورکړی دی چي غواړي په دې وسیلې سره د هغو د نورو حملو څخه مخنیوی وکړي. کیربي وویل چي امریکا متحده ایالات د خپل ځان د دفاع د حق مطابق عمل کړی دی. هغه همدارنګه وویل چي جو بایدن په دغو حملو سره واضح کړه چي دی معامله کول غواړي، تر څو امریکايي قواوي وساتي.
د روان کال د فبروري میاشتي په اخره کي هم امریکايي پوځ د سوریې په ختيځ کي هوايي حملې کړي وې چي د دوی په حواله د ايران پلوه ملېشو ډېر غړي پکښې ووژل سول. دا د بایدن د جمهور رئيس کیدو راوروسته لومړۍ نظامي حمله وه.
د دغي حملې په ارتباط هم د امریکا د دفاع وزارت ویلي وه چي دا «فقط د ځان د دفاع» په خاطر یوه حمله ده چي په عراق کي پر امریکايي عسکرو او د هغوی پر متحدینو باندي د حملې په عکس العمل کي تر سره سوې ده.