امريکا: د اسرائيل په ملاتړ مظاهرې باندې بريد شوی
۱۴۰۴ خرداد ۱۲, دوشنبه
د پولیسو په حواله یوه ۴۵ کلن مصري وګړي د یکشنې (د جون میاشتې ۱) په ورځ د امریکا د کولراډو ایالت د بولدر ښار په مرکز کې په داسې حال کې چې له حماس ترهګرې ډلې له خوا د يرغمل شويو اسرائیلي وګړو په ملاتړ کې مظاهره روانه وه، کوکتل مولوتوف ته ورته اور لګونکي وسیله په مظاهره کې د گډون کوونکو پر لور وغورځوله.
په دې برید کې ۶ تنه ټپیان شول. د رپوټونو په حواله برید کوونکی کس هم د پيښې په جریان کې ټپي شوی دی او اوس په روغتون کې دی. پولیس چارواکو د نوموړي کس د ټپي کیدو د څرنگوالي په هکله جزویات نه دي وړاندې کړي.
د پولیسو او عیني شاهدانو په حواله برید کوونکي چې په ځینو رسنیو کې یې هویت محمد صبري سلیمان، ښودل شوی دی، د برید پر مهال د «فلسطین آزاد کړئ» شعارونه ورکول. د پولیسو د اعلان مطابق دغه کس نیول شوی دی.
د امریکا د ملي امنیت یا استخباراتو ادارې مشر تولسي ګابارد، په ایکس (پخواني ټویټر) شبکه کې دغه پيښه «د یهودي ټولنې د غړو پر هفته یي مظاهرو یو هدفمند ترهګریز برید» بللی دی.
د بولدر ښار د پولیسو مشر سټیو ردفیرن، د یوه ابتدایي خبری کنفرانس پر مهال ویلي و چې تر اوسه پورې د دې برید د انګیزې په اړه څه ویل به تر وخت مخکې وي. هغه زیاته کړه: «په اوس وخت کې یو ترهګریز برید مطرح نه دی.»
دا په داسې حال کې ده چې د امریکا د تحقیقاتو فدرالي اداره (FBI) د یوه ترهګریز برید په توګه د دې پيښې د ارزونې په حال کې ده او د دې سازمان مشر کاش پاتل، د پيښې له رامنځته کیدو لږ وروسته دا یو هدفمند ترهګریز برید بللی و.
د کولراډو برید په داسې یوه وخت کې رامنځته کیږي چې څه کم دوه اونۍ مخکې په واشنګټن کې د یهودانو د موزیم مخته د اسرائیل د سفارت دوه کارمندان په ډزو ووژل شول. د څارنوالۍ په حواله وسله وال بریدګر خپل دغه اقدام «له فلسطینیانو څخه د ملاتړ» په استناد توجیه کړی دی.