هند او پاکستان يو پر بل متقابلې ډزې کړي
۱۴۰۴ اردیبهشت ۸, دوشنبه
د هند پوځ نن، دوشنبه ويلي دي چې هندي او پاکستاني عسکرو د کشمیر په لانجمنه سيمه کې په پرله پسې څلورمه ورځ متقابلې ډزې کړي دي.
خو په دې ترڅ کې د تلفاتو په اړه رپوټ نه دی ورکړل شوی او په اسلام آباد کې حکومت هم په سملاسي توګه د ډزو خبر نه دی تائيد کړی.
هند تېره اونۍ په کشمیر کې د وسله والو له لوري د ۲۶ کسانو تر وژل کیدو وروسته پر پاکستان د «پولې له بلې غاړې څخه د ترهګرۍ »د ملاتړ تور لګوي. د هند تر ولکې لاندې کشمیر په پهلګام سيمه کې دغه بريد په تېرو کابو درو لسیزو کې پر ملکيانو تر ټولو ناوړه بريد دی.
اړونده موضوع: ورځپاڼه: پاکستان باید له ترهګرو سره خپلې اړیکې پای ته ورسوي
خو د پاکستان حکومت په دې بريد کې د هر ډول نقش درلودل رد کړي او په پاکستان پورې د دې بريد تړل یې بې ارزښته خبره بللې او د هند د اقدامات پر ضد یې د غبرګون ښوولو هوډ څرګند کړی.
د هند د پوځ په اعلاميه کې د کشمیر د لانجمني سيمې سرحد ته په اشارې سره ويل شوي: «د اپريل د ۲۷ او ۲۸ نیټې ترمنځ شپه کې د پاکستان د پوځ له پوستو څخه د کنترول پر کرښه بې دليله د سپکو وسلو ډزې وشوې.»
اړونده موضوع: «هندي او پاکستاني ځواکونو په سرحد کې يو پر بل ډزې کړي»
په اعلامیه کې زياته شوې: «هندي ځواکونو هم چټک او اغیزناک ځواب ورکړی.»
داپريل د ۲۲مې نیټې تر بريد وروسته په نوي ډهلي کې حکومت له پاکستان سره د ديپلوماتانو شمیر را کم کړ، پر پاکستاني وګړو یې د هند ویزې بندې کړې، د اوبو د ویش تړون یې وځنډاوه او له دغه هېواد سره یې د مهمې سرحدي لارې د تړلو اعلان وکړ.
په ځواب کې یې اسلام آباد هم د هندي ديپلوماتانو او پوځي مشاورينو د ايستلو امر وکړ، پر هنديانو یې د پاکستان ویزې بندې کړې او خپل هوايي قلمرو یې هم د هندي الوتکو پر وړاندې بند کړ.
ملګرو ملتونو او همدا شان چین پر دغو دوو پخوانو دښمنانو د «حداکثر زغم» څخه د کار اخيستنې غږ کړی څو دغه مسئله «د ګډې معنادارې ښکيلتيا له لارې په سوله ایزه توګه حل» کړل شي.