لس سلنه تعرفه؛ افغانستان امریکا ته کوم توکي صادروي؟
۱۴۰۴ فروردین ۱۴, پنجشنبه
د امريکا متحده ايالاتو ولسمشر دونالد ترمپ، د هغو تعرفو ترڅنګ چې لا دمخه موجودې دي، د نړۍ د ۱۸۰ هيوادونو او سيمو پر وارداتي توکو له لس فيصدو نيولې تر ۴۹ سلنه تعرفی وضع کړي دي، چې د امريکا له شریکانو نیولې تر سيالانو لکه چین پورې ترې اغیزمن شوي دي.
افغانستان هم په دې نوملړ کې د هغو هيوادونو په کتار کې ځای لري چې له ۱۰ سلنه تعرفې سره مخامخ دی.
د امريکا د حکومت د تعرفو د جدول پر اساس، افغانستان ته د امريکا پر صادراتي توکو ماليه ۴۹ فيصده ده.
امريکا متحده ايالاتو ته د افغانستان صادرات
د افغانستان د سوداګرۍ او پانګونې خونه وايي چې دغه هيواد امريکا ته هر کال د ۶۰۰ تر ۸۰۰ ميليون ډالرو په ارزښت صادرات لري او د ترمپ، له لوري وضع شوې تعرفه به د دغه هيواد پر صادراتو منفي اغیزه ولري.
د افغانستان د سوداګرۍ او پانګونې خونې مرستیال خان جان الکوزي، د پنجشنبې په ورځ (د ۲۰۲۵م کال د اپريل ۳) له دويچه ویله سره په خبرو کې وویل چې افغانستان متحده ایالاتو ته لاسي صنايع، وچه ميوه او غالۍ صادروي.
اړونده موضوع: صنعت کاران: که مو ستونزې حل نه شي له سقوط سره مخ کیږو
الکوزي، وويل: «د امريکا له لوري وضع شوې تعرفه به بې له شکه پر صادراتي توکو (منفي) اغیزه ولري.»
د طالبانو ادارې تر اوسه په دې اړه نظر نه دی څرګند کړی او روښانه نه ده چې د دې تعرفو وضع کيدل به مشخصاً د افغانستان اقتصاد ته په کومه اندازه زيان ورسوي.
افغانستان د «جي اس پي» هيوادونو يا د لږو پرمختللو هيوادونو غړی دی. الکوزي، وویل چې له همدې کبله د افغان سوداګرو مالونه اروپايي اتحادیې او امريکا ته پرته له تعرفو صادرېدل.
د الکوزي، د معلوماتو پر اساس افغانستان ته د امريکا د تجارتي اموالو واردات کم دي او په کال کې د ۴ تر ۵ میليون ډالرو رسيږي چې ځيني درمل او اليکترونيکي وسايل پکې شامل دي.
الکوزي، وويل چې د نورو هېوادونو پر وارداتي توکو د افغانستان ګمرکي تعرفه يو ډول ده او داسې نه ده چې ګويا د مختلفونو هيوادونو پر وارداتي توکو دې مختلفې تعرفې وضعه شوي وي.