مېرڅ غواړي له زيلنسکي سره د واشنګټن په ناسته کې ګډون وکړي
۱۴۰۴ مرداد ۲۶, یکشنبه
د آلمان حکومت په یوه اعلامیه کې ويلي چې صدراعظم فریدریش مېرڅ به د اروپايي کميسیون له مشرې اورزولا فون دير لاین او نورو اروپايي رهبرانو سره په دغه غونډه کې برخه واخلي تر څو «په اوکراین کې د سولې یو چټک تړون له پاره خپله علاقه بیان کړي.»
په اعلامیه کې راغلي چې «په بحثونو کې به د نورو موضوعاګانو تر څنګ امنيتي ضمانتونه، ارضي یا ځمکني مسائیل او د روسيې د یرغل څخه د دفاع له پاره له اوکراین څخه د ملاتړ موضوعات شامل وي.» په اعلامیه کې دغه راز زیاته شوې ده چې په دغو موضوعاتو کې به «د تحریمونو د فشارونو حفظ هم شامل وي.»
نور ولولۍ: روسيې واشنګټن ته د زیلنسکي له تلو مخکې پر اوکراین حملې کړي
واشنګټن ته تر سفر مخکې د یکشنې په ورځ مېرڅ، د فرانسې ولسمشر امانویل ماکرون او د بریتانیا صدراعظم کیئر سټارمر د متحدینو د یوې غونډې کوربتوب وکړ. دغه غونډه د زیلنسکي د موقف د تقویې، په ځانګړې توګه اوکراین له پاره د ځواکمنو امنيتي ضمانتونو په هيله وه چې په هغې کې به د امریکا متحده ایالاتو رول هم موجود وي.
د ترمپ، پوتین او زیلنسکي درې اړخیزه ناسته
اروپايي متحدین غواړي د ترمپ او زیلنسکي د فبروري میاشتې د جنجالي ناستې له تکراره مخنیوي وکړي. یاده غونډه چې د سپینې ماڼۍ په بیضوي دفتر کې وه زیلنسکي په کې د ترمپ او د هغه د مرستیال جي دې وینس تر شدیدو نیوکو لاندې راغی او زیلنسکي هم ورسره بحث مخ ته وړه.
اروپايي قدرتونه غواړي د ترمپ،پوتین او زیلنسکي د ېوې درې اړخیزې غونډې په تنظیمولو کې مرسته وکړي او د دې ډاډ حاصل کړي چې اوکراين په راتلونکو کې د مذاکرې په مېز کې خپل ځای ولري.
نور ولولۍ: ترمپ تائید کړه چې له پوتین سره هوکړې ته نه دی رسیدلی
بل لوري ته د فنلنډ ولسمشرۍ ماڼۍ ويلي چې ولسمشر الکساندر شتوب هم د زیلنسکي او ترمپ تر منځ غونډه کې د ګډون له پاره واشنګټن ته ځي.
همدارنګه د ايټالیا صدراعظمه جورجیا میلوني چې د ترمپ له اکثرو سیاستونو ستاینه کوي، هم د واشنګټن د دوشنبې ورځې په غونډې کې ګډون کوي.
ترمپ: اوکراین باید د سولې تړون وکړي
د واشنګټن ناسته په الاسکا کې د امریکا متحده ایالاتو او روسیېې د ولسمشرانو د جمعې ورځ مخامخ غونډې درې ورځې وروسته جوړيږي. ترمپ تېره ورځ وویل چې اوس په اوکراین کې د اوربند له پاره د فشارونو پر ځای د سولې پر یو جامع تړون فکر کوي.
ترمپ د جمعې په ورځ وویل چې اوکراین باید له روسیې سره د جګړې د پای له پاره یوې هوکړې ته ورسيږي، ځکه چې پر وینا ېې «روسیه یو ډېر ستر ځواک دی او دوی نه دي.»
نور ولولۍ: د اروپايي ټولنې مشران: اوکراین باید د سولې په پروسه کې ښکیل وي
رويټرز د سرچينو له قوله خبر ورکوي چې ترمپ او پوتین پر یو لړ وړاندیزونه بحثونه کړي چې روسيه د اوکراین ځينې کوچنۍ اشغالي برخې پرېږدي او اوکراین ېې په بدل کې په شرق کې خپلې مستحکمې ځمکې روسیې ته خوشې کړي او لومړنۍ کرښې یو بل ځای ته راوړي.