په آلمان کي پناه غوښتونکو ډېر ماشومان زیږولي
۱۴۰۰ خرداد ۲۷, پنجشنبه
د آلمان د احصايې ادارې د جون میاشتي پر شلمه نېټه د پناه غوښتونکو د نړیوالي ورځي په مناسبت اوس خبر ورکړی دی چي د ۲۰۱۵ او ۲۰۱۹م کلونو تر منځ په دغه هيواد کي هر کال په اوسط ډول ۲۷۲۰۰ کوچنیان د پناه غوښتونکو په کورنیو کي زیږیدلي دي.
د نوموړي ادارې په حواله تر ۲۰۱۵م کال پنځه کاله مخکي هر کال په اوسط ډول ۴۴۰۰ زېږېدلي کوچنیان د پناه غوښتونکي په توګه ثبت سوي دي.
د پنجشنبه په ورځ (۲۰۲۱م کال د جون مياشتي ۱۷) د دغه خپور سوي خبر له مخي د دې کار علت له ۲۰۱۴م څخه تر ۲۰۱۶م کاله پوري آلمان ته د ډیرو مهاجرو په تیره بیا ځوانانو راتگ په گوته سوی دی.
له همدې کبله له ۲۰۱۶م کال راهیسي په مجموعي ډول د زېږون کچي پر کمیدو سربیره بیا هم په راتلونکو کلونو کي اټکل کیږي چي په آلمان کي به پناه غوښتونکي ډېر کوچنیان و زېږوي.
په آلمان کي د »پناه غوښتونکي« اصطلاح هغه چاته کاريږي چي د پناه غوښتنه یې کړې وي، د پناه غوښتني پروسه یې جریان ولري، هغه مهاجر چي د پناه غوښتني عریضه یې رد سوې وي او دولدونگ یا مؤقتي ویزه ولري او همدارنگه هغه مهاجر چي قبول سوي وي. د بهرنيانو هغه ماشومان چي په آلمان کي و زېږي د ویزې د اقامت ډول يې په اول سر کي د هغوی د مور او پلار د ویزې په ډول پوري اړه پیدا کوي.
GP/NZ/AG