د یوې مور څخه د یوه سِنت غوښتنه څومره ګرانه تمام سوه

د «اکسپرس» په نامه یوې المانۍ ورځپاڼي خبر ورکړ، چي د دوسلدورف ښار د کار پیدا کولو ادارې یا Bundesagentur für Arbeit کله چي د دغه ښار د یوې مور څخه د ۱۵۰ یورو او یوه سنت غوښتنه وکړه او هغې ورته ۱۵۰ یورو حواله او یو سِنت پاته سو، نو بیا یې د یوه خط د ورلیږلو پواسطه د هغې څخه د یوه سنت غوښتنه وکړه.

د کار پیدا کولو ادارې د فقط یوه سِنت د غوښتلو پخاطر لا ډیرې پیسې مصرف کړي. دوی په دې توګه لیکلی اخطار ورکړی، چاپ کړی، وخت یې پرې مصرف کړی او د پست له لاري یې ورلیږلی، چي یوازي یې د خط استول په تقریبأ یوه یورو ورته تمام سو.

دا چي اوس دې کار یوه لویه رسوايي رامنځته کړې ده، د دوسلدورف د کار پیدا کولو ادارې ویلي، چي «یوه غلطي پيښه سوې ده او موږ کوښښ کوو، د هغه توضیحات ورکړو.»