له آلمان څخه اخراجونه ډېر شوي دي
۱۴۰۴ خرداد ۲, جمعه
له آلمان څخه د اخراج کیدونکو شمیر د روان کال په لومړيو دريو میاشت کې لوړ شوی دی. د آلمان په پارلمان کې د کيڼ اړخه ګوند د ګوندي ډلګۍ د غوښتنې په ځواب کې حکومت ويلي دي چې له جنوري څخه تر مارچ میاشتې پورې په ټولیزه توګه ۶۱۵۱ کسان اخراج شوي دي.
که چېرې د ټول کال هغه یې حساب شي نو دا کابو ۲۴ زره انسانان کيږي. په دې توګه دا شمیر د تېر ميلادي کال له اوسط څخه لوړ دی: په ۲۰۲۴م کال کې په ټولیزه توګه کابو ۲۰ زره کسان او په ۲۰۲۳م کال کې بيا تقريباً ۱۶ زره او ۵۰۰ کسان اخراج شوي ول.
اړونده موضوع: د آلمان د نفوس يو په څلورمه برخه د کډوالۍ رېښې لري
نوی حکومت، نوې تګلارې
په لومړۍ ربع کې ترسره شوي اخراجونه لا د آلمان پخواني حکومت عملي کړي ول. د می له ۶مې نیټې راهېسې واکمن حکومت چې د آلمان د مسيحي ديموکرات، مسيحي سوسيال او سوسيال ديموکرات ګوند ترمنځ د ائتلاف په پایله کې جوړ شوی دی، اعلان کړی دی چې په راتلونکي کې به اخراجونه نور هم شديد کړي.
مسيحي ديموکرات او مسيحي سوسيال ګوندونو پخپله انتخاباتي مبارزه کې د اخراجونو شديدول د مهاجرت د خپل سیاست اصلي هدف ياد کړی وو. دا په دې معنا ده چې د دې امکان شته چې د کال په جريان کې د اخراجيدونکو شمير لاپسې لوړ شي.
اړونده موضوع: د آلمان د پولو کنترول؛ څلور افغان پناه غوښتونکي بیرته لوکزامبورګ ته ولیږل شول
په لومړۍ ربع کې ترکیې، ګورجستان، فرانسې، هسپانیې او صربستان ته په ځانګړي توګه ډېر کسان اخراج شول.
د ۱۷۰۰ اخراجونو په اړه په اصطلاح د ډبلن مقررات صدق کوي. يعني د اروپايي اتحادیې د دغو مقرراتو له مخې پناه غوښتونکي هغو هيوادونو ته ليږدول کيږي چې لومړی ورته داخل شوي وي او مکلف دي چې د پناه غوښتنه هم هلته وکړي.
پر دې سربیره عراق (۱۵۷ کسان) او ايران (۵ کسان) ته هم اخراجونه شوي دي.
د ليږد ګران بیه چارتر پروازونه
د رپوټ په حواله له دې اخراجونه يو پر دريمه برخه یې د ګران بيه چارتر پروازونه په مټ وشول. درېمګړو هېوادونو لکه پاکستان، ايتوپيا، نايجیريا، ګانا او کامرون ته ډله ایز اخراجو په ځانګړي توګه ډېر ګران بيه وو. د مثال په ډول پاکستان ته يوازې يو دا ډول پرواز په ۴۶۲ زره يورو تمام شو.
ايتوپيا (۴۱۸ زره يورو) او د لویدیځې افريقا نورو هېوادونو ته پروازونو هم ورته لګښتونو درلودل. دا لګښتونه قسماً د اروپايي ټولنې د بهرنیو پولو د ساتنې د «فرونتکس» په نامه آژانس پر غاړه واخیستل.
اړونده موضوع: له آلمانه افغانستان ته د «ایراني او پاکستاني» مهاجرو د اخراج په هکله ضد او نقیض څرګندونې
د آلمان د پارلمان د کیڼ اړخه ګوند استازې کلارا بونګر، پر چارواکو کلکې نیوکې وکړې. نوموړی وویل چې د يو شمیر داسې قضيو په اړه معلومات لري چې په ترڅ کې یې پولیسو او د خارجيانو ادارې چارواکو «وحشيانه او بې له هر ډول همدردۍ» چلن کړی دی.
نوموړې د «ريداکسيون نيټڅوېرک» رسنۍ سره په خبرو کې وويل: «موږ له دې څخه خبره کوو چې کورنۍ پرته له همدردۍ سره جلا کړل شوې او يا دا چې ناروغه کسان له روغتونو تښتول شوي او د اخراج په پروازونو کې اچوول شوي ول.»