د المان د بُن ښار په اطرافو کې دری مړي موندل شوي
۱۴۰۴ فروردین ۱۷, یکشنبه
د المان پولیسو د یکشنبې (د اپریل میاشتې ۶ نیټه) په سهار د المان د بُن ښار په ۶۰ کیلومترۍ کې د وایټفلډ کلي د استوګنې په سیمه کې عملیات پيل کړل چې په پایله کې یې د درو کسانو جسدونه وموندل شول. پولیسو ویلي چې دغه عملیات یې د اطلاع له ترلاسه کیدو وروسته پیل کړي دي.
د دغو مړو د هویت او پيښې رامنځته کیدو د څرنګوالي په هکله تر اوسه پورې نور جزویات نه دي ورکړل شوي.
د پولیسو ویاند په دې اړه له تفصیل ورکولو څخه ډډه وکړه، خو یوازې همدمره یې وویل چې تصور کیدلی شي چې د یکشنبې سهار په لومړیو ساعتونو کې یو جرم ترسره شوی وي.
پولیسو په سیمه کې له موټر چلوونکو څخه غوښتي دي چې په دې سیمه کې د هر ډول کسانو له پورته کولو یا سپرولو څخه دې ډډه وکړي؛ ځکه د احتمالي مجرم یا مجرمانو د پيدا کولو له پاره څیړنې دوام لري.
ډیر شمیر پولیس افسران د پيښې ځای ته استول شوي او پلټنې دوام لري.