المان کې د ټاکنو اړوند ناسمو معلوماتو په اړه خبرداری
۱۴۰۳ اسفند ۴, شنبه
په المان کې دپارلماني ټاکنو د ترسره کیدو په درشل کې د دغه هیواد امنیتي بنسټونو په ټولنیزو شبکو کې د جعلي یا ناسمو اطلاعاتو موارد، چې احتمالاً په روسيه کې ریښې لري، لیدلي دي.
د شته اطلاعاتو له مخې دغه موارد د «شتورم- ۱۵۱۶» په نوم کمپاین پورې مرتبط ګڼل شوي دي. د دې ارتباط لامل د خپریدو په میتود او همدارنګه د ویډیوګانو د محتوا ډیر ورته والی دی. په برلین کې د المان د کورنیو چارو وزارت دغه معلومات تایید کړي دي.
«شتورم- ۱۵۱۶» یوه روسۍ تبلیغاتي ډله ده چې په هدفمند ډول په انټرنټ کې ناسم معلومات تولید او خپروي. د دې ډلې اصلي هدف پر عمومي افکارو اغیز کول، پر دیموکراسۍ د بې باورۍ رامنځته کول او په مختلفو هیوادونو کې د روسیې د حکومت د ګټو ملاتړ دی.
د رای ورکونې د پاڼو په اړه جعلي ویډیوګانې
د المان د کورنیو چارو وزارت په مشخص ډول دوو ویډیوګانو ته اشاره کړې ده چې په همدې روانه اونۍ کې خپاره شوي دي. دغه ویډیوګانې د داسې یوه تصور رامنځته کولو له پاره ترتیب شوي دي، چې ګواکې د المان له پاره بدیل ښي اړخی ګوند د یکشنې (د ۲۰۲۵م کال د فیبرورۍ ۲۳ نیټه) ورځې په پارلماني ټاکنو کې په غیر عادلانه ډول له تبعیض سره مخامخ دی.
دغه ګوند د المان د اساسي قانون د حفاظت محکمې له خوا د تقریباً ښي اړخې افراطي ګوند په توګه طبقه بندي شوی دی.
ایا د AfD ګوند رایې د کاغذ پارچه کوونکي دستګاه کې اچول شوي؟
په یوه له دغو جعلي ویډیوګانې کې ښودل کیږي چې د زاکسن ایالت په لایپزیګ ښار کې د رایې اچونې په پاڼو کې د المان له پاره د بدیل AfD ښي اړخي ګوند نوم نشته دی.
په یوه بله ویډیو کې چې په هامبورګ کې ثبت شوې ده د پوسته خانې له لارې د رایې اچونې پاڼې ښودل کیږي چې لادمخه د المان له پاره بدیل ګوند په ګټه نښه شوي او په پارچه کوونکي یا د کاغذ میده کوونکي دستګاه کې اچول کیږي.
د المان د کورنیو چارو وزارت د ویاند په خبره، دغه ویډیوګانې «ډیر نه دي لیدل شوي، خو په هر حال پر پارلماني ټاکنو د اغیز کولو له پاره د یوې هدفمندې هڅې ښکاریندویې کوي.»
د لومړۍ ویډیو په هکله د زاکسن ایالت جنایې ادارې خپلې څیړنې پیل کړي دي. د دویمې ویډیو په هکله چې په ټولنیزو شبکو کې خپره شوې، د هامبورګ د ټاکنو ایالتي مسئول ډیر ژر غبرګون ښکاره کړ او هغه یې جعلي اعلان کړه.
د امریکا له ټاکنیز کمپاینونو سره ډیر شباهت
د المان د کورنیو چارو وزارت د دغو ویډیوګانو او په امریکا متحده ایالاتو کې د تیر کال ټاکنیزو کمپاینونو ترمنځ «ډیر مشابهت» ته اشاره کړې ده.
په هغه وخت کې هم ډیرې داسې ورته جعلي ویډیوګانې خپرې شوې وې چې «شتورم- ۱۵۱۶» ته نسبت ورکول کیده او د امریکا متحده ایالاتو د استخباراتي ادارې له خوا د «روسیې د نفوذ کولو عملیاتو» په توګه پيژندل شوي وو.
د دا ډول ناسمو اطلاعاتي عملیاتو هدف «پر دیموکراسۍ د عمومي باور کمزوری کول او د ټاکنیز بهیر د شفافیت په هکله د شک او تردید رامنځته کول» دي.
د المان د کورنیو چارو وزارت ویاند ټینګار کړی دی چې په المان کې د انتخاباتو د اونۍ په پای کې به د امنیتي او ټاکنیزو بنسټونو ترمنځ نږدې او دایمي اړیکې برقراره وي، څو د ورته مواردو را برڅیره کیدو په صورت کې وکولی شي په چټکۍ سره غبرګون ښکاره کړي او اطلاع رسونه وکړي.