د کندز هوايي برید: اروپايي محکمې د آلمان پر ضد دوسیه رد کړه
۱۳۹۹ بهمن ۲۸, سهشنبه
په ۲۰۰۹م کال کې د آلماني جنرال په امر په کندز کې د تيلو پر دوو تښتول شوی ټانکرونو باندې د امریکايي جټ الوتکې په یوه هوايي برید کې لسګونه کسان ووژل شول.
په فرانسه کي د اروپا د بشري حقونو محکمې پخپله د دغه بريد قضيه و نه ارزول، بلکي دا يې وڅېړل چي آيا آلمان د دغه افغان د حقوقي شکايت په اړه کافي تحقيق کړی دی که نه.
ياده محکمه د سه شنبې په ورځ (۲۰۲۱م کال د فيبروري ۱۶مه) دې پايلي ته ورسېده چي «په دغه بريد کي د مدعي د دوو زامنو د مرگ په اړه شرايطو ته په کتو سره آلماني چارواکو اغېزمن تحقيقات کړي دي.»
د جورج کلاین په نامه آلماني جنرال په کندز ولایت کې د آلماني ځواکونو له یوه پوځي مرکز څخه د دغه هوايي برید امر کړی وو.
هغه مهال دغه آلماني جنرال ویره څرګنده کړې وه چې تښتول شوي ټانکرونه ښايي د یاغیانو له لوري د بریدونو د ترسره کولو له پاره وکارول شي.
د استخباراتي معلوماتو برعکس، جنرال کلاین سمدلاسه د هوايي برید پریکړه وکړه چې پکې ګڼ شمیر داسې ملکیان ووژل شول چې طالبانو له ټانکرو څخه د نفتو د ایستلو له پاره دعوت کړي وو.
عبدالحنان چې په دې پیښه کې یې خپل دوه زامن له لاسه ورکړي وو، وروسته له هغې چې آلمان د جنرال کلاین د برأت پریکړه وکړه، د آلمان پر ضد د بشري حقونو اروپايي محکمې ته شکایت وکړ.
دغه افغان تور پورې کړی چې آلمان د موثرو استخباراتي معلوماتو پر بنسټ عمل نه دی کړی او دا چې په آلمان کې د دې ستونزې له پاره حل له لاره نه ده لټول شوې.
نن د فرانسې په شتراسبورګ کې د بشري حقونو اروپايي محکمې دغه دوسیه رد کړه. د یادولو وړ ده چې تر دې وړاندې هم د آلمان تر ټولو لوړې محکمې یعنې د اساسي قانون د ساتنې محکمې هم د عبدالحنان شکایت او دوسیه رد کړې وه.