په بلوچستان کې پر يوه ريلګاډي د وسله والو بريد
۱۴۰۳ اسفند ۲۱, سهشنبه
د سيمې پوليسو او د ريلګاډي ادارې چارواکو د «جعفر ايکسپريس» په نوم مسافر وړونکي اورګاډي باندې د ډزو خبر تائيد کړی دی. د بلوچانو د «بلوچ ليبرېشن آرمي» يا بي ال ای ډلې د بريد پړه منلې ده او ادعا یې کړې ده چې د امنيتي ساتونکو په ګډون یې نور مسافر هم يرغمل کړي دي.
اړونده موضوع: پاکستان؛ د اورګاړي په تم ځای کې د ځانمرګي برید له امله ۲۴ کسان وژل شوي
د ريلګاډو ادارې له خوا ويل شوي دي چې د بريد په ترڅ کې د ريلګاډي چلوونکی ټپي شوی دی. همدا شان زياته شوې ده چې د جعفر ايکسپريس په نوم ريلګاډي په ۹ واګنونو کې شا او خوا ۴۰۰ مسافر سپاره ول او اورګاډی د بلوچستان له مرکز کوېټه څخه د خیبر پښتونخوا د پېښور ښار ته روان وو.
د ريلګاډي د دولتي ادارې يوه چارواکي رويترز خبري آژانس ته وويل چې امنيتي ځواکونه په بولان کې پرتې سيمې مشکاف ته رسيدلي چېرته چې دا بريد شوی دی.
د سيمه ایز حکومت وياند شاهد رند، وويل چې د بلوچستان حکومت بيړني تدابير غوره کړي او ټولې ادارې لاس په کار شوي دي.
اړونده موضوع: پاکستان: په بلوچستان کې درې سندي سلمانان وژل شوي دي
د پاکستان په بلوچستان کې د بيلتون غوښتونکو وسله والو ډلو له لوري له څو لسیزو راهېسې د روان شورش په پایله کې په سيمې کې تل دا ډول پېښې رامنځته کیږي.
دا بيلتون غوښتونکي غوښتنه کوي چې د ایالت په طبيعي زيرمو کې دې ونډه ورکړل شي. د بي ال ای ډله وايي چې د بلوچستان طبيعي زېرمې په غير منصفانه ډول ويشل کیږي.