اسرائيل غزې ته په مرستو د بار کښتۍ د رسېدو مخه نيولې
۱۴۰۴ خرداد ۱۹, دوشنبه
د «فريدم فلوتېلا کواليشن» په نوم ډلې تائيد کړې ده چې د مدلين په نوم کښتۍ چې غزې تړانګې ته یې بشري مرسته رسوله، د اسرائيل د ځواکونو له خوا درول شوې ده.
دغي ډلې د يوې اعلامیې له لارې ويلي دي چې کښتۍ یې په نړيوالو اوبو کې د اسرائيل د پوځ له خوا په زرو درول شوې ده.»
د « The Freedom Flotilla Coalition» يا «اف اف سي» ډلې ويلي دي: «کښتۍ په غیر قانوني توګه نیول شوې، بې وسلې ملکي عمله یې تښتول شوې او پکې بار ژوند ژغورونکي توکي چې د تي خورو ماشومانو خواړه، خوراکي توکي او طبي تجهیزات شامل دي، ضبط کړل شوي.»
اړونده موضوع: حماس وايي د مرستو د وېش پرمهال ۳۰ تنه وژل شوي خو د غزي بشري بنسټ ېې ردوي
د «فريدم فلوتېلا» تنظيموونکې او د بشري حقونو وکيلې هویدا عراف، وویل چې اسرائيل په مدلين کې د رضاکارو د نيولو «هيڅ قانوني اختيار نه لري.»
نوموړې زياته کړې ده چې پر کښتۍ دا بندیز له نړيوالو قوانينو سرغړونه ده او د عدالت د نړيوالې محکمې (ICJ) د «هغو الزامي حکمونو سره په مخالفت کې واقع کیږي چې غزې ته د بې له خنډه بشري مرستې رسېدو لارښوونه کوي.»
په اعلامیه کې راغلي دي چې اسرائيل د رضاکارو د نیول هیڅ قانوني اختیار نه لري «چې د اسرائيل د قضاوت په داېره کې شامل نه دي او د مرستې رسولو او يا د غير قانوني کلابندۍ د ننګولو له کبله مجرم نه شي ګڼل کیدلای.»
عراف، وويل: «د دوی نيول خپل سري عمل او غیر قانوني دی او باید ژر تر ژره آزاد کړل شي.»
په مرستو بار کښتۍ تر نیول کیدو وروسته اسرائیل ته رسول کيږي
د اسرائيل د بهرنیو چارو وزارت له خوا ويل شوي دي چې د «مدلين» په نوم کښتۍ چې غزې تراډې ته یې بشري مرستې رسولې، نیول شوې او «په خوندي توګه د اسرائيل ساحل ته پر لاره ده.»
وزارت د ايکس پر شبکې باندې ليکلي تمه کیږي چې په کښتۍ کې سپاره کسان چې د سويډن اقليمي فعاله کريتا تورنبیرګ، او نور فعالان پکې شامل دي، به بیرته خپل هېوادونه ته ستانه شي.
اړونده موضوع: اسرائيل: د م. م. د سرمنشي څرګندونې «شرموونکي» دي
د وزارت له خوا ويل شوي: «په داسې حال کې چې کريتا، او نورو د رسنیو د پام راګرځولو هڅه کوله چې موخه یې يوازې د شهرت ترلاسه کول وو، او په مرستو کې د يوې بار لارۍ هم کم مواد شامل وو، په تېرو دوو اونیو کې تر ۱۲۰۰ ډېر په مرستو بار لارۍ له اسرائيل څخه غزې ته داخلې شوي دي.»
د وزارت په اعلامیه کې راغلي: «دغه کوچنۍ مرسته به چې په کښتۍ کې بار وه او د دغو مشهورو کسانو له لوري نه ده مصرف شوې، د حقیقي بشري کانالونو له لارې غزې ته ورسیږي.»
د «فريدم فلوتیلا کوالیشن» سازمان چې د مدلين په نوم کښتۍ نوښت یې کړی، پر اسرائيل باندې یې په کښتۍ کې د سپرو کسانو د «يرغمل نیولو» تور لګولی دی.