دونالد ترمپ، وايي امريکا له ايران سره خبرې اترې پلانوي
۱۴۰۴ فروردین ۱۹, سهشنبه
د امريکا متحده ايالاتو ولسمشر دونالد ترمپ، د دوشنبې ) ۲۰۲۵م کال د اپريل ۸( په ورځ وویل چې امريکا له ايران سره خبرې اترې پلانوي.
ترمپ، د دې په زياتولو سره چې دا به «کابو د لوړې کچې» خبرې وي، وويل: »موږ د شنبې په ورځ ډېره ستره ناسته درلودله او موږ له هغوی سره [ايرانيانو] سره په مستقيمه ډول په اړيکه کې يو.»
اړونده موضوع: خامنه يي له امريکا سره د نويو اتومي مذاکراتو په اړه خبرداری ورکړی
د ايران د بهرنيو چارو وزير تائيد کړه چې خبرې اترې به ترسره شي، خو هغه دا خبرې «غير مستقيم د لوړ کچې« مذاکرتو په توګه يادې کړې چې د عمان هېواد به یې کوربتوب وکړي.
عباس عراقچي، د ټولنیزو رسنیو د ايکس شبکې له لاري وويل: «دا يوه آزموينه او په عين حال کې تر ډېره يو فرصت هم دی. د پريکړې واک د امريکا په لاس کې دی.»
ترمپ وايي که چېرې خبرې ثمره ونه لري «ايران به په ستر خطر» کې وي
ترمپ، په ډېره چټکۍ سره د خبرو اترو ترمخه انتظارات يو څه راکم کړل او ویې ويل چې که چېرې خبرې ناکاميږي «نو ايران به له ستر خطر سره مخامخ شي.»
نوموړي وويل: «ايران نه شي کولی اتومي وسلې ولري او که چېرې خبرې اترې بريالۍ نه شي نو زه په رښتيا فکر کوم چې دا به د ایران له پاره يوه ډېره بده ورځ وي.»
اړونده موضوع: ټرمپ: د اکتوبر پر اوومه پر اسرائیل د برید لامل ایران و
د متحده ايالاتو ولسمشر دا څرګندونې په داسې حال کې وکړې چې نوموړي د اسرائيل لومړي وزير بنيامين نتانياهو، ته چې ایران د منځني ختیځ ثبات ته ګواښ ګڼي، هرکلی ووايي. نتانياهو، همدا راز ټینګارکوي چې ایران بايد اتومي وسلې ونه لري.
د ايران او متحده ايالاتو نږدې تاريخ څه دی؟
واشنګټن او تهران د ولسمشر جو بايدن، د حکومت په دوره کې په غیر مستقيمو خبرو اترو کې ښکيل ول خو دغو بحثونو ډېر پرمختګ نه درلود.
د دواړو هيوادونو ترمنځ وروستي مستقيم مذاکرات هغه وخت ترسره شوي ول چې بارک اوباما د متحده ایالاتو ولسمشر وو. د اوباما، په مشرتوب کې د ۲۰۱۵م کال نړيوال اتومي تړون رامنځته شو چې د بندیزونو د لغوه کولو په بدل کې یې د ايران اتومي پروګرام محدود کړ. خو ترمپ، په ۲۰۱۸م کال کې پخپله لومړۍ دوره کې له دغه تړون څخه په يو اړخیزه توګه ووت.
له هغه وخت راهېسې تهران هم د دغه تړون شرائطو ته نور ژمن نه دی.
اړونده موضوع: د ایران د حکومت سخت مخالف، مارک روبیو، د امریکا خارجه وزیر سو
د ايران ولسمشر مسعود پزشکيان، په دې وروستيو کې دایران د اتومي پروګرامپه اړه له متحده ایالاتو سره د مستقیمو خبرو اترو مفکوره رد کړې وه او ویلي یې ول چې هغه غير مستقيمې اړیکي ته ترجيح ورکوي.
هغه ويلي ول چې ایران د مذاکراتو مخالف نه دی، خو امريکا بايد خپل پخوانی «ناسم چلند» اصلاح کړي او د باور له پاره نوی تهداب جوړ کړي.