خيبر پښتونخوا کې باران او سېلاب درنه مرګ ژوبله اړولې
۱۴۰۴ مرداد ۲۴, جمعه
د خيبر پښتونخوا ایالت د طبيعي پېښو سره د مبارزې مديريت ادارې (پي ډي ام ای) په حواله اکثريت د مړينې پېښې د دغه ایالت په غرنيو سيمو کې شوي دي.
د دغې ادارې سيمه ایزو چارواکو وويل چې ۱۸ تنو نورو بيا د پاکستان تر ادارې لاندې کشمير او ګلګت بلتستان سيمه کې ژوند له لاسه ورکړی دی.
د خیبر پښتونخوا ایالت د ژغورنې د آژانس ویاند بلال فيضي په دغه ایالت کې د ۱۴۶ کسانو د مړينې خبر ورکړی دی.
اړونده موضوع: پاکستان: د موسمي ورښتونو له کبله د مړو شمېر له ۲۰۰ اوښتی
تر دې دمخه د «پي ډي ام ای» وياند انور شهزاد، د فرانسې خبري آژانس ته ويلي ول: «تر اوسه د خيبر پښتونخوا په بېلا بېلو سيمو کې د ناڅاپي شدید باران، سېلابونو او د کورونو د چتونو راپرېوتو له کبله تر ۱۱۰ ډېرو کسانو ژوند له لاسه ورکړی دی.» نوموړي زیاته کړې چې ۶۰ تنه نور ټپيان شوي دي.
انور شهزاد، زياته کړې چې باجوړ، بونبیر، مانسهره او بټګرام کې د ناورين ځپلو سيمو په توګه نومول شوي.
په باجوړ کې چې د افغانستان سره پر پوله پرته سيمه ده، د تندر او ناڅاپي ګڼ باران له کبله د ۱۶ کسانو د وژل کيدو خبر ورکړل شوی دی.
د هوا پيژندنې ادارې په شمال لویدیځ کې د درنو اورښتونو خبر ورکړی دی او له خلکو یې غوښتي چې «حساسو سيمو ته دې له غير اړينو سفرونو ډډه وکړي.»
د هند تر ولکې کشمیر کې هم ځاني زيان اوښتی
د هند تر ولکې لاندې کشمیر کې ژغورونکو د جمعې په ورځ له خټو او لې څخه تر هغه وروسته يو شمیر جسدونه را ايستلي دي چې يو کلی سېلاب سخت اغیزمن کړ. په دې کلي کې د لږ تر لږه ۶۰ کسانو د مړينې او يو شمیر نورو په سېلاب کې د لاهو کيدو خبر ورکړل شوی دی.
اړونده موضوع: پاکستان: په وروستیو موسمي سيلابونو کې ۱۱۱ کسان مړه شوي
د مون سون موسمي بارانونو په فصل کې سېلابونه او د ځمکې ښوېدنې پېښې ډېرې عامې دي. دغه فصل د جون میاشتې څخه بيا د سپتمبر تر پای پورې دوام لري.