چین د امریکا د تعرفو د ګواښ په مقابل کې چمتوالی نیسي
۱۴۰۳ اسفند ۱۳, دوشنبه
د امریکا متحده ایالاتو ولسمشر دونالډ ټرمپ تیره اونۍ چین ته د ۱۰ سلنه اضافي تعرفو لوړولو ګواښ کړی و. له دې سره به په مجموع کې پر چینایي توکو محصول ۲۰ سلنه شي.
واشنګټن تور لګوي چې بیجینګ امریکا ته د فنتانیل مخدره موادو د جریان د مخنیوي له پاره کافي اقدامات نه دي کړي، خو د چین د سوداګرۍ وزارت بیا دا د «باج ګیرۍ» معادل بللی دی.
ګلوبل ټایمز ورځپاڼې د یوې نامعلومې سرچینې په حواله وویل: «د فنتانیل په بهانه پر چینایي توکو د امریکا له خوا د ۱۰ سلنه اضافي تعرفو د لوړولو تر ګواښ وروسته، بیجینګ د اړوندو ځوابي اقداماتو غوښتنه او تیاری نيسي.»
په رپوټ کې زیاته شوې ده: «په ځوابي اقداماتو کې به احتمالاً تعرفوي او غیر تعرفوي دواړه ډوله اقدامات شامل وي او په دې لیست کې به د امریکا کرنیز او خوراکي محصولات هم شامل کړای شي.»
تیر کال تر ټولو دمخه د حاکم کمونیست ګوند تر کنترول لاندې «پیپلز ډیلي» رسنۍ دا رپوټ ورکړی و چې د اروپايي اتحادیي له خوا پر چینایي برقي موټرو د تعرفو په بدل کې چین د ځوابي اقداماتو پلان جوړ کړی دی.
د ټرمپ تر اعلان وروسته د ځوابي اقدام یا کوم تړون کولو له پاره بیجینګ له یوې اونۍ څخه هم لږ وخت درلود.
بیجینګ اوس هم د مصالحت غوښتونکی دی
د امریکا له خوا د اضافي تعرفو اعلان په داسې یو وخت کې شوی دی چې د چین د پارلمان کلنۍ غونډ پيلیدونکې ده. تمه کیږي چې په دې غونډه کې به د بیجینګ د ۲۰۲۵م کال پر اقتصادي لومړيتوبونو بحث وشي.
شنونکي وایي چې بیچینګ اوس هم د ټرمپ له حکومت سره پر سازش یا مصالحت د خبرو کولو تمه لري. خو د سوداګریزو خبرو اترو هیڅ اثر نه لیدل کیږي او داسې معلومیږي چې د دواړو سترو اقتصادي قدرتونو ترمنځ د سازش کولو هیلې د ورک کیدو په حال کې دي.
په داسې حال کې چې له ۲۰۱۸م کال راهیسې په وارداتو کې کمښت راغلی دی، خو سره له دې هم چین د امریکا د کرنیزو محصولاتو تر ټولو لوی بازار دی.
بیجینګ د ټرمپ له خوا په ۲۰۱۸م کال کې پر چینایي توکو د تعرفو وضع کولو په ځواب کې پر سویابین، د غویي غوښې، د خنځیر غوښې، غنم او جوارو ۲۵ سلنه مالیه لګولې وه.
بیجینګ له ۲۰۱۸م کال راهیسې د زراعتي توکو وارداتو پر متنوع کولو او د لا زیات غذایې مصئونیت له پاره د داخلي محصولاتو پر زیاتولو ټينګار کوي.