پاکستان: بمي بريد ۵ کسان وژلي او په لسونو نور يې ټپیان کړي
۱۴۰۰ اسفند ۱۷, سهشنبه
د چارواکو په حواله دا بمي چاودنه د سه شنبې په ورځ د بلوچستان په سيبي ښارګوټي کې شوې ده. د پوليسو يوه مشر اختر رسول د آلمان خبري آژانس ته وويل چې چاودنه تر هغه يو څو دقيقه وروسته وشوه چې د پاکستان د ولسمشر عارف علوي د موټرو کاروان د سيمې څخه تیر شوی وو.
ولسمشر عارف علوي په يوه کلتوري مېله کې د ګډون له پاره سيمې ته سفر کړی دی. د پوليسو يوه بل وياند اجمل بلوچ وويل چې سملاسي معلومه نه ده چې آیا نوموړی د بريد هدف وو او که څنګه.
د سيمې د مرکزي روغتون يوه ډاکتر سرور هاشمي وويل چې تر اوسه پنځه جسدونه او ۲۸ ټپيان ور وړل شوي دي.
پېښه په داسې حال کې کیږي چې د تېرې جمعې په ورځ د پېښور په قصه خوانۍ بازار کې په یوه مسجد کې د داعش له خوا استول شويو دوو ځانمرګو بريد کوونکو لږ تر لږه ۶۳ تنه ووژل.
داعش د پيښور د جمعې ورځې د برید مسئولیت ومانه
په افغانستان کې واک ته د طالبانو تر رسېدو وروسته په پاکستان کې زرو زياتی ډېر شوی دی. چارواکي وايي چې د تازه بريدونو زياتره عاملين د سرحد له بلې غاړې يعني افغانستان له خاورې څخه فعاليت کوي.
بلوچستان د پاکستان د مساحت له پلوه تر ټولو ستر ایالت دی چې په دې وروستيو کې په تر ټولو ناامنه ولايت هم بدل شوی دی او د اسلامپالو وسله والو، سني مذهبه ډلو او ناسيوناليستي بیلتون پالو ډلو له خوا په نخښه کيږي.
په سيمه کې د چین د پانګونو تر پلانونو وروسته د زورزياتي ډيريدو ته د ياغيانو له خوا د غبرګون په سترګه کتل کیږي. چين پلان لري چې سنکيانګ ایالت د سړکونو او ريل د پټليو له لارې د عربي سمندرګي سره وصل کړي.
د چين او پاکستان د اقتصادي دهليز دا ۶۰ ميليارډ ډالري پلان موخه لري چې پيکنګ له تر ټولو لنډو ځمکنيو او سمندري لارو د منځنۍ آسيا، اروپا او افریقا له بازارونو سره ونښلوي.
ب. ص/ ن . ز (DPA)