امریکا د سپينې روسیې پر ۹ دولتي شرکتونو بندیز لګولی دی
۱۴۰۰ خرداد ۸, شنبه
یوه اونۍ وروسته تر هغې چې سپینې روسیې د رایان اير مسافر وړونکي هوایي شرکت الوتکې مسیر تغیر او په اجباري توګه یي کښینوله، د جو بایډن حکومت هم د ولسمشر آلکساندرو لوکاشنکو حکومت د یو شمیر کلیدي څیرو او شرکتونو پر وړاندې بندیزونه په پام کې نیولي دي.
د سپینې ماڼۍ ویاندې جین ساکي، اعلان کړی دی چې د سپینې روسې (بلاروس) ۹ دولتي شرکتونه او د دغه هیواد یو شمیر سیاسي مشران په هغو بندیزونو کې شاملیږي چې د راتلونکي اونۍ څخه به عملي شي.
د سپينې ماڼۍ ویاندې ویلي دي چې دغه بندیزونه د امریکا له اروپایي نورو ټولو متحدینو سره په هم غږۍ په پام کې نیول شوي دي.
جنجال د راین ایر شرکت د الوتکې مسیر تغیرولو پر سر راپورته شوی دی. دغه الوتکه چې له اتن څخه د لیتواني پر لور روانه وه، د بلاروس د یوې جنګي الوتکې په وسیله یې په اجباري توګه مسیر بدل او د دغه هیواد د پلازمېنې «مینسک» په هوایي ډګر کې کښینول شوه.
د بم د احتمالي موجودیت په بهانه د دغې الوتکې تر کيښنول کیدو وروسته د سپينې روسېې امنیتی ځواکونو د دغه هیواد د حکومت منتقد خبریال رومان پروتاسویچ ونیوه.
د دې اقدام په غبرګون کې اروپايي هیوادونو په خپل فضایې قلمرو کې د دغه هیواد پر پروازونو بندیز ولګاوه. سربیره پر دې د سپينې روسیې الوتکې به د اروپایي اتحادیې د غړو هیوادونو په هوایي ډګرونو کې د کښيناستلو اجازه هم ونه لري.
آژانسونه: ش.ن/ ا.ا