د ايران گواښ؛ امريکايي بيړۍ په فارس خليج کې پاتيږي
۱۳۹۹ دی ۱۵, دوشنبه
د «يو اس اس نيمیتز» په نوم الوتکې ليږدونکې بيړۍ د تېر میلادي کال له نومیر مياشتې راهيسې د فارس خليج د اوبو د امنيت د کنترول په موخه په سيمه کې ده. د امريکا د دفاع وزارت تر دې مخکي اعلان کړی وو چې د دې بيړۍ د انتقال تصميم لري.
د فرانسې خبري آژانس د دوشنبې په ورځ (د جنورۍ ۴ مه نیټه) له واشنگټن څخه د يوه رپوت په نشرولو سره د دفاع وزارت له خوا له فارس خليج څخه د دې بيړۍ د ايستلو د تصميم په اړه د نظر د بدلون خبر ورکړی دی.
د دې رپوټ په حواله پنتاگون د قاسم سليماني د لومړي تلين پر وخت پريکړه کړې چې د ايران «وروستيو گواښونو» ته د ځواب ويلو په موخه دغه بيړۍ د فارس خليج په اوبو کې پریږدي.
د دسمبر پر ۳۱ مه نیټه د امريکا د دفاع وزارت اعلان کړی وو چې د يادې بيړۍ د راستنولو فرمان د دفاع سرپرست وزير کريستوفر میلر صادر کړی دی.
نيويارک ټايمز ورځپاڼې د امريکا د نظامي چارواکو له خولې ويلي ول چې له فارس خليج څخه د نيمیتز بیړۍ د ايستلو د سياست هدف د امريکا او ايران ترمنځ د تاوتريخوالي د کمولو په هدف تعقيبیږي.
اړونده موضوع: د فارس خليج پر فضا بيا د بي ۵۲ ډوله الوتکو پروازونه
په دې وروستیو کې د ځينو ایراني چارواکو له خوا د قدس ځواک د مشر قاسم سليماني د وژنې د غچ اخيستنې په پار د گواښونکو څرگندونو د ډېريدو په نتیجه کې پنتاگون د دې بيړۍ د ايستلو پر پريکړه له سره غور وکړ.
کريستوفر میلر په خپله تازه اعلاميه کې ويلي: «د امريکا متحده ایالاتو د ولسمشر دونالد ترمپ او نورو امريکايي مسولينو په هکله د ایران د مشرتابه وروستيو تهديدونو ته په کتو سره مې دا فرمان صادر کړی دی چې «يو اس اس نيمیتز» به خپلو عملياتو ته دوام ورکړي.»
د امريکا د دفاع دغه سرپرست وزير اعلان کړی دی چې هیڅ هيواد بايد د متحده ایالاتو پر هوډ شک ونه کړي. خو ميلر د «تازه تهديدونو» په تړاو توضيحات ور نه کړل.
د يکشنبې په ورځ (د جنورۍ ۳ مه نیټه) په بغداد کې په زرونو کسانو د قاسم سليماني د تلين پر مهال د امريکا د بې پېلوټه الوتکې په بريد کې د قدس ځواک د دغه مشر د وژل کيدو په مناسبت په مظاهرو کې گډون وکړ. په دغو مظاهرو کې د امريکا پر ضد شعارونه ورکړل شول او له عراقه یې د ځواکونو د ايستلو غوښتنه وشوه.
ب. ص/ ن. ز (AFP)
زموږ له آرشيف څخه: