د آلماني پوځ د افغان همکارانو یوه ډله آلمان ته را ورسیدله
۱۴۰۰ مرداد ۲۹, جمعه
په افغانستان کې د آلماني ځواکونو د سیمه ایزو همکارانو او د هغوې د کورنیو د غړو لیږدونکي دوه بسونه د جمعې ورځې (د اګست میاشتې په ۲۰) په سهار له فرانکفورت/ ماین څخه د دوبیرلوګ/ کیرش هایم سیمه کې د پناه غوښتونکو د نوم ثبتونې مرکزونو ته را ورسیدل.
د آلمان د کورنیو چارو وزارت ویاند مارتین بورمایستر، ویلي دي دغه کسان په افغانستان کې د آلمان د ماموریت سیمه ایز کارمندان دي. په دې ډله کې ۲۹ تنه ماشومان او ځوانان شامل دي.
دغه پرواز چې ټاکل شوی وه د پنجشنبې په ماښام آلمان ته را ورسیږي، د خلکو د راجستر کولو پروسې له کبله ډیر زیات ځنډیدلی و.
په لومړي سر کې دغو افغانانو ته د خوراک او څښاک او همدارنګه روغتیایي امکانات برابر کړای شوي و. دغه نوي راغلي کسان باید دری ورځې قرنطین شي او شاید د سه شنبې تر ورځې پورې د دوبرلوګ-کیرش هایم، په منطقه کې پاتې شي. وروسته به بیا دغه کسان د آلمان په نورو ولایتونو کې وویشل شي.
وروسته تردې چې روانه اونۍ طالبانو د افغانستان واک په خپل لاس کې ونیوه، آلماني پوځ هڅې پيل کړي دي چې په دغه هیواد کې د حفاظت ترلاسه کولو په لټه کې هغوی د امنو ځایونو ته انتقال کړي.
د تیرې دوشنبې ورځې راهیسې له کابل څخه تر ۱۶۰۰ ډیر کسان په مختلفو پروازونو کې له دغه هیواد څخه وتلي دي.
آژانسونه: ش.ن/ ق.ن