بنت د افغانانو د ولسي محکمې د جوړولو هرکلی کړی
۱۴۰۴ مرداد ۱۰, جمعه
د افغانستان له پاره د بشري حقونو په برخه کي د ملګرو ملتونو ځانګړي استازي ريچارد بنت، په ايکس شبکه کي ليکلي دي: «زه د افغانانو په مشرۍ ولسي محکمې د جوړيدو هرکلی کوم چي د حساب ورکولو په برخه کي د قربانيانو او ژوندي پاته سويو کسانو پر شهادت باندي تمرکز کوي.»
هغه زياته کړه چي عدالت ډېري بڼي لري. د هغه په خبره دغه پروسه بايد جامع، پراخه او پر قربانيانو باندي متمرکزه وي.
اړونده موضوع: یوناما د طالبانو له لوري د ښځو او نجونو پر نیولو اندېښنه وښوده
د پنجشنبې په ورځ د افغانستان د څلورو مدني ټولنو ائتلاف يوه اعلاميه خپره کړه چي پکښې د ولس د دايمي محکمې په چوکاټ کي د افغانستان د ښځو محکمې د جوړيدو خبر ورکړ.
دغه محکمه غواړي چي د طالبانو له خوا د ښځو سرکوب کولو او ځوروني قضيې وڅېړي. دغه ائتلاف ويلي دي، دا چي افغان مېرمني او نجوني د طالبانو له خوا له سيستماتيک ظلم سره مخ دي، نو دا په افغانستان کي د ښځو له حقونو څخه د سرغړوني د مخنيوي له پاره يو مخکښ ګام دی.
له هغه وخت راهيسي چي طالبان يووار بیا په افغانستان کي واک ته رسېدلي دي، د ښځو پر تعليم او کار باندي يې سخت محدوديتونه لګولي دي او ښځي او نجوني له ډېرو حقونو څخه بې برخي سوي دي.
د دغي اعلاميې له مخي د افغانستان څلور څارنوالان چي هر يو يې د جنسيت پر بنسټ تاوتريخوالي کي تخصص لري، اوس تورونه چمتو کوي څو محکمې ته يې وړاندي کړي.
له دغو څارنوالانو سره د اسنادو راټولولو يو ټيم او يو شمېر نړيوال متخصصين کار کوي.
ټاکل سوې ده چي د يادي محکمې لومړۍ غونډه به د روان کال د اکتوبر میاشتي پر اتمه نېټه په مادريد کي وي او په ټوله نړۍ کي به په ژوندۍ بڼه خپره سي. تمه کيږي چي د قضايي هيئت به د روان کال د ډسمبر مياشتي په لومړۍ نيمايي کي خپله وروستۍ پريکړه وکړي.
اړونده موضوع: د افغان مېرمنو یوې ډلې د طالبانو رهبرانو د نیولو د غوښتنې هرکلی کړی
تيره مياشت د جرمونو نړيوالي محکمې د طالبانو د مشر ملا هيبت الله اخندزاده او د هغوی قاضي القضات عبدالحکيم حقاني د نيولو امر وکړ. هغوی دښځو او نجونو د ځوروني په سبب په بشريت ضد جنايت تورن سوي دي.
د افغانستان د مدني ټولني ائتلاف ويلي دي چي دوی د افغانستان په اړه ټولو حساب ورکولو ميکانيزمونو ملاتړ کوي او د طالبانو د مشرانو د نيولو هرکلی کوي. خو ټينګار يې وکړ چي دغه ګام کافي نه دی.