په پاکستان کې د طالبانو ملاتړ ډېر شوی؛ اغیزې به یې څه وي؟
۱۴۰۰ تیر ۲۲, سهشنبه
په دې وروستيو کې نه يوازې په پېښور کې د افغان طالبانو بيرغونه وليدل شول، بلکې د پاکستان د بهرنيو او کورنيو چارو وزيرانو شاه محمود قريشي او شيخ رشيد هم د «افغان طالبانو په ملاتړ» څرګندونې وکړې.
خو د دغه هيواد مدني ټولنه نه يوازي د وزيرانو پر څرګندونو ډېره په غوسه ده، بلکې د طالبانو د محبوبيت د ډېريدو په اړه یې هم اندېښنه څرګنده کړې ده.
«د يوې سکې دوه مخه»
د طالبانو له پاره د ملاتړ پر ډيرېدو ډېرې انديښنې د ښځو د حقونو له پاره فعاله ټولنو څرګندې کړي دي ځکه چې د هغوی په آند په ماضي کې هم افغان او هم پاکستاني طالبانو له ښځو سره ډېر توپيري چلند کړی دی.
د وومن ايکشن فورم په نوم ټولنې څخه مهناز رحمان وايي چې پاکستاني او افغان طالبان د يوې سکې دوه مخه دي. نوموړې له دويچه ويله سره په خبرو کې وويل: «له نظرياتي او فکري نظره افغان او پاکستاني طالبان يو ډول دي او دا خبره د طالبانو يوه استازي سهيل شاهين له سليم صافي سره په مرکه کې هم کړې وه. د ښځو په اړه د دواړو فکر يو ډول دی او کله چې له شاهين څخه د ښځو د حقونو په اړه وپوښتل شول نو ځواب یې واضح نه وو او ویې ويل چې د دې پريکړه به مفتيان کوي.»
پاکستان کې د طالب پلوو شعارونو او بيرغونو له کبله څیړنې
مهناز رحمان وويل چې د بشري حقونو ټولنې د طالبانو د دې محبوبيت په اړه اندېښمنې دي او له افغانستان څخه د رسېدونکو خبرونو په اړه هم ډېر تشويش لري.
هغې وويل چې د افغان طالبانو له پياوړي کيدو سره پاکستاني طالبان هم پياوړي کيږي. نوموړې زياته کړه چې طالبانو [تحريک طالبان پاکستان ډلې] د پېښور د پوځي ښوونځي شاګردان په نخښه کړل او تر ديرشو زرو ډېر پاکستانيان یې ووژل.
هغې زياته کړه: «هغوی د بېلا بېلو فرقو او مترقي فکر لرونکي مسلمانان او د اقليتونو غړي په نخښه کړل. له دې ډول کسانو سره خواخوږي او د هغوی حمايت د هغو خلکو پر زخمونو د مالګې پاشل دي چې د کورنۍ غړي یې د ترهګرۍ ضد جګړې په ترڅ کې د تندلارو د بريدونو هدف شوي.»
ملاتړ د تاسف وړ دی
د بشري حقونو ملي کمېسيون غړی انيس هارون وايي چې طالبانو په افغانستان کې د ښځو پر حقونو د بندیزونو په لګولو پېل کړی دی. نوموړي وویل: «موږ له افغان ښځو سره يووالی څرګندوو چې د طالبانو پر ضد مقاومت کوي. په پاکستان کې د طالبانو له پاره مخ پر زياتېدونکي ملاتړ او خواخوږي د تاسف وړ خبره ده، خو د پاکستان مدني ټولنه او ښځې چمتو دي دغه تندلارې ټولنه وننګوي.»
پاکستان: د افغان مليشو جوړول ودروئ
نوموړي زياته کړه: «په پاکستان کې د افغان طالبانو دا ډول ملاتړ به د پاکستان د تندلارو ډلو مورال هم لوړ کړي.»
د ماضي تیروتنې
د اسلام آباد يوه شنونکي ايوب ملک وويل چې پاکستان د نويمې لسیزې تيروتنه تکراروي چې ډېره درنه بيه به یې پاکستانۍ ټولنه پرې کوي. هغه وويل: «په نويمه لسيزه کې هم موږ د طالبانو ملاتړ وکړ چې په نتيجه کې یې د تحريک طالبان پاکستان ډله جوړه شوه چې په پاکستان کې یې په زرونو خلک ووژل د ميليونو ډالرو زيان یې ورسوه.»
نوموړي زياته کړه: «طالبانو پر زيارتونو، مقبرو او د شعيه مذهبو پر عبادتځایونو بريدونه وکړل او هغه مسلمانان یې هم په نخښه کړل چې له دوی سره همنظره نه ول. د افغان طالبانو دا ډول ملاتړ په دې معنا دی چې د پاکستاني طالبانو ډله به يو ځل بيا فعاله شي او دلته به خپلې جرړلې وغځوي.»
د نوموړي په خبره تحريک طالبان پاکستان ډلې لا د مخه د مختلفو قبایلي سيمو له پاره خپل ګورنران ټاکلي دي. هغه زياته کړه: «پر دې سربيره په ګلګت بلستان کې طالب قوماندانان ځای پر ځای شوي دي او د دې علت دا دی چې د پاکستان اسټيبلشمنت [حکومت او پوځ] يو ځل بيا د طالبانو ملاتړ کوي.»
هغه زياته کړه: «د پاکستان سياسي ګوندونه او مدني ټولنه بايد له افغانانو سره ودريريږي.»
عبدالستار، اسلام آباد
زموږ له آرشيف څخه: