د جرمني محکمو د ډیرو افغانانو د پناه غوښتني منلي دي
۱۴۰۰ مرداد ۹, شنبه
الماني خبري آژانس dpa، دغه خبره د جرمني په پارلمان کي د چپي ګوند د وکیلي، اولا یلپکه په جواب کي د دغه هیواد د داخله وزارت په حواله کړې ده. په خبر کي راغلي چي د ۴۲۱۲ عارض سوو افغانانو د جملې څخه فقط د ۱۰۰۹ کسانو دعوې رد سوي دي. په بل عبارت د افغانانو عریضو په محکو کي ۷۶ فیصده بریالیتوب درلود.
دا هم پداسي حال کي ده، چي د ۲۰۲۰م کال په عین وخت کي بیا د تقریبأ ۵۵ فیصدو افغانانو د پناه غوښتني دعوې په محکمو کي کامیابه وې.
د جرمني د کورنیو چارو وزارت د تیري پنجشنبه په ورځ (د جولای میاشتي ۲۹ مه) ویلي دي چي د افغانستان د حکومت هغه غوښتنه چي دغه هیواد ته د افغانانو د اخراج پروسه متوقفه کړي، دوی به یې ارزیابي کړي.
د جرمني حکومت اساساً کوښښ کوي چي د طالبانو پر پرمختګ او بریالیتوبونو سربیره دغه هیواد ته د رد سوو افغانانو د اخراج پروسه بیا هم ممکنه کړي.
خو په پارلمان کي د چپیانو د داخلي سیاست ویانده، اولا یلپکه وايي، چي «زما دپاره دا یو راز دی، چي څه شی باید دومره ډیر وخت ارزیابي سي. ځکه زما په نظر کاملاً واضح ده، چي نور باید یو څوک هم افغانستان ته اخراج نسي.»
یلپکه پدې ارتباط د افغانستان دپاره د ملګرو ملتو د ماموریت «یوناما» هغو ارقامو ته اشاره کوي، د کوم پراساس چي د همدې ۲۰۲۱م کال یوازي د می او جون په میاشتو کي ۲۳۹۲ ملکي کسان ټپیان سوي او یا وژل سوي دي.